منتدى الفرح المسيحى - بتتصور فين في بيتك

https://upload.chjoy.com/uploads/156628571020041.jpg

بتتصور فين في بيتك؟

أنا لاحظت ان صور كتيرة قوي بنأخدها عند باب الشقة،

ففكرت ليه !
و لقيت ان جايز عشان كتير بيكون باب الشقة من انظف الأماكن في بيتنا ،

ففكرت ليه !
و لقيت ان جايز عشان ناس كتير بتشوفه و هي معديه من بره فبنبقي عايزينه اشيك حاجه في الدنيا،

ففكرت ليه!
لقيت أن احنا بنحكم علي الجواب من عنوانه
يعني لو باب الشقه شيك بنتوقع ان البيت كله هيكون كده،
لكن للأسف ساعات كتير الباب بيكون ملوش اَي علاقة بشكل البيت من جوه..

و عشان كده جوازات كتير بتفشل و علاقات كتير بتجرح،
لأننا اخدنا انطباع عن شكل البيت من جوه بس من شكل الباب إللي بره..

أحسن حاجه يكون شكل الباب في إمكانيات إللي جواه ..
يعني الموبايل سعره و نوعه متناسب مع دخلك..
يعني عربيتك و أقساطها مش أكثر من إمكانياتك،
يعني لبسك الجديد و الماركات مش بتخلص مرتبك..
يعني بتعيش اللي بتقوله و بتقول اللي بتعيشه..

كده شكل الباب هيليق مع اللي جواه. و ينفع ساعتها تتصور في اَي حته جوه بيتك 😊