منتدى الفرح المسيحى - الوقت لوحده مش هيغيرنا

https://upload.chjoy.com/uploads/156600397219041.jpg

هي بس مسأله وقت و هتكرر اللي عيشته زمان،
و مفيش حاجه اسمها الوقت بيغير،

الوقت مش هيخليك تنسي ان ابوك كان بيضربك بس هتلف الأيام
و تلاقي نفسك قليل الحيلة انك تربي صح و تلاقي نفسك متعرفش و مشوفتش
غير الضرب فتبدأ أنت كمان تضرب ولادك مع انك اتوجعت من الطريقة ديه..

الوقت مش هيخليك تنسي ان مامتك كانت إنسانه مسيطره
وهتلف الأيام و تلاقي نفسك مش عارفه تحسي بالأمان غير لما تبقي حبال كل الأمور في أيدك
و تبدأي تكوني نسخه جديده من الزوجه و الأم المسيطره..

الوقت مش هيخليكوا تنسوا النموذج المؤلم لجوازه اهلكم.
و هتلف الأيام و تلاقوا نفسكم في برود و فتور و مش عارفين تتواصلوا ازاي..

احتماليه اننا نكرر الأوضاع اللي عيشناها عاليه
عشان اللي حصل بيكون هو المدرسه الوحيدة اللي عشناها و طلعنا منها..

عشان نوقف الدايرة ديه محتاجين تواضع اننا نعترف بمشاكلنا.،
محتاجين شجاعه نطلب مساعده، محتاجين وقت و معرفه
عشان نخلق مدرسه جديده نتعلم منها عن الجواز ، التربيه و العلاقه الصح بنفسنا.

الوقت لوحده مش هيغيرنا.