منتدى الفرح المسيحى - خللي بالك من الجرجرة

https://upload.chjoy.com/uploads/156487569642471.jpg

تشتري عربية عجبتك بس أغلي من إمكانياتك ، يبقي بنزينها كتير و غالي
، قطع غيارها نار و تدوخك علي ما تلاقيها، تدور لها علي جراج مخصوص
و تيجي تبيعها تخسر فيها فوق ما تتصور..

تشتري شقة مش علي قد جيبك و ما تلزمكش اصلا من غير ما تحسبها كويس
(بسبب الإعلانات و الدعاية)، يبقي تتورط في اقساطها ، تشطيبها نار ،
و صيانتها فوق طاقتك ؛ و ممكن ما تروحهاش أساسا أو تروحها في السنة مرة ..

تتفق مع حد علي معاملة مالية أو تمضي عقد شقة أو تأمين أو أي حاجة مشابهة
، تتسرع و توافق ، و تلاقي بنود ما قريتهاش كويس ،
و تكتشف انك كنت مغيب و اتزحلقت و وقعت في الخية ،
و عليك مصاريف خفية ما اتقالتش، و تقول يا ريتتي ما اتسرعت..

خللي بالك ، الناس مش سهلة، و البيع و الشرا له اساليبه،
و الفلوس و المكاسب مصيدة يا ما وقع فيها حتي اللي فاهمين .
.يغروك و يحطوا لك الطعم، وبعد شوية يتقفل عليك باب المصيدة ..

الحكمة : ما تجريش ورا عينيك ، و ما تصدقش اي اغراء ..
صدق عقلك مش مشاعرك
، و استشير قبل ما تتورط، و اشتري اللي فعلا لازمك و له قيمة حقيقية
و ح تفيدك أو تفيد اسرتك أو اولادك ..

خللي بالك من الجرجرة و الزحلقة و الورطة ، أصلها كترت قوي قوي بالذات اليومين دول