منتدى الفرح المسيحى - لم الزيت اللي نازل

https://upload.chjoy.com/uploads/156461932256021.jpg

لما واحد يتكلم شوية زيادة عن ربنا يقولوا له كام جملة كده من عينة :

-خدنا علي جناحك
-اللهم قوي ايمانك
-يا واد يا مؤمن !!
-لم الزيت اللي نازل !!

ويظهر أن الناس من كتر ما شافت "مدعين التدين" ،
ما بقتش مصدقة أن فيه ناس حلوة قوي و أمينة قوي و تقية جدا ..
و يظهر أن العملة الردية من كترها غلوشت علي العملة الجيدة ..

و انا عاذر اللي بيقول كده ، و مقدر صدمتهم في "انصاف المتدينين" ..
و دي دعوة للصدق و الصراحة و الأمانة..

عاوز تحب ربنا و تعيش له اعمل كده من قلبك، عاوز تبقي براحتك
و تعمل اللي في مزاجك برضه براحتك ، (بس استحمل النتيجة)
، لكن ابدا اوعي تمثل أو تدعي بدأت تعمل نفسك أبو العريف..

عاوز تقرا كلمة الله علشان تعيشها و تصلي من قلبك علشان تقرب من ربنا براحتك،
و عاوز تبعد عنه براحتك برضه (بس استحمل النتيجة) ، لكن اوعي تصلي منظرة
، أو تقرا لك كلمتين في الكاتب المقدس تعمل نفسك "عالم"
و تعدل علي الناس و تحط نفسك فوقهم و تلف علي المواقع تنقض
و تنقد و انت ما تعرفش عن الله و لا حاجة ..

اوعي تمثل علشان ما تتعبش نفسك و تعثر الناس..
و كمان علشان اللي بيمثل انه متدين ابعد واحد عن ربنا و صعب قوي يوصله،
لأنه بيكدب علي نفسه و يصدقها ..

علي الاقل البعيد عن الله في يوم ح يرجع ، إنما اللي "عامل نفسه" متدين ،
بيطلع الناس كلها وحشة و هو بس اللي فاهم ، عمر ما الكلام يأثر فيه (!) ،
و مش ح يرجع لله إلا بصدمة كبيرة تفوقه..

و بعد ده كله زي ما فيه ناس بتدعي التدين و تاعبة نفسها و مدوخة الناس
و شوكة في ضهر الكنيسة ، صدقوني فيه ناس فعلا ليها جناحين من نور ، كلها نقاوة
، و بجد كلها بركة و قداسة ، و بجد ينفع تقول لها "خدنا علي جناحك " ، بس بجد الجد !!