منتدى الفرح المسيحى - كون تسبيحة في أرض خزيك

https://upload.chjoy.com/uploads/156385468739541.jpg

الموضوع ده لكل شخص شعر أنه قليل
فى عين نفسه وعين اللى حواليه
لكل انسان حاول بعض الأشخاص أنهم يقللوا منه
أو يشعروه بصغر النفس رغم قدراته
اللى خلقت جواهم نوع من أنواع الحقد فابتدوا يكسروا فيه

اول ما بدأت شغل كان زميلي في الشغل دايما يضايقني
ويقول كلام كله سلبي عليا
واكتر الكلمات اللي كان بيوصفني بيها هي
اني قليلة التركيز.. اني بنسى بسرعة..
اني غير مُنظمة في شغلي وكلمات كتير من هذا القبيل
اخدت وقت مصدقة عن نفسي الصورة دي
والأصعب اني كنت بصدر الصورة دي عن نفسي لكل اللي حواليا
لكن في مرة زاد فيها الكلام ده بشكل ضغطني جدا جدا
وبكيت كتير اوي بسبب الكلام ده وان بتعاير بضعف
(او زي ما كنت فاكرة انه ضعف عندي)
المدير التنفيذي كان عارف اللي حصل ووصل المشكلة للمدير العام
المدير العام استدعاني يسمع مني وقالي بالنص كدة:
انتي ازاي تسمحي لحد يقلل منك
وانا بنفسي شايفك انك عندك إمكانيات
وقدرات كبيرة جدا اكبر من فلان ده ١٠٠ مرة
وقالي ان انا مفهمه انك مديرة المكتب فا ازاي يتعامل معاكي كدة
وقتها فهمت الشخص ده بيتعامل معايا كدة ليه
وبيقول عني كدة ليه.. هو كان عارف اني ليا صلاحيات
وإمكانيات اكبر منه
وانا اللي مكنتش عارفة
هو كان بيحاول يحول نقط قوتي لضعف
ويفهمني ان هي اصلا نقط ضعف فيا
لاني لو فوقت لنفسي هعلي وافوقه في الشغل بكتير
ومن يوم ما أدركت انا مين في المكان وايه اللي عندي
وانا الكل بيشهد بتركيزي وذكائي وذاكرتي
وتنظيمي في الشغل وبقيت مديرة لاتنين
رغم صغر سني ومرتبي زاد الضعف
ده بقى بالظبط مبدأ العدو معانا انه يحاربك
في نقط قوتك ويفهمك انها نقط ضعف..
انه يقلل من قيمتك وإمكانياتك
على فكرة هو ابليس مش هيظهرلك يقولك كدة بنفسه
بس هو بيستخدم اشخاص حواليك
وربما أقرب الناس ليك علشان يعمل فيك كدة
لانه عارف كويس جدا انك لو أدركت قيمتك وإمكانياتك
هتكون نهايته ومش هيقدر عليك
متخليش كلام سلبي يوصمك ويحدد انت مين
خليك واعي وكل كلمة سلبية تتقال ليك صمم انها تكون نقطة قوتك ونجاحك
ملحوظة: علشان اوصل للي وصلتله جاهدت شوية
لاني كنت اتوصمت بالكلام السلبي وجوايا صدقه بشكل أثر عليا
فا بقيت اكتب علشان مانساش بطئت خطوتي في الشغل
علشان أنظم الدنيا واركز كويس جدا
فا ركز انك تاخد خطوات ناحية تغيير المعايرة والكلام السلبي
اول خطوة وأهم خطوة انك ماتصدقش
وانك تدرك جواك ان كل نقطة ضعف وصفك بيها العدو
هي نقطة قوتك ونقطة رعبه منك
انت مش اللي بيتقال عنك.. انت الطبيعة والحقيقة
والصفات السماوية اللي شكلك بيها ابوك السماوي
اللي يعرفك اكتر من نفسك ومن اللي حواليك
كون تسبيحة في أرض خزيك 💪💪💪💪