منتدى الفرح المسيحى - التواضع يكسب

https://upload.chjoy.com/uploads/156382780604611.jpg

اشهر اية "الله محبة" (ايو ٤ : ٨ و ١٦) ،
لكن محبة من غير تواضع ما تتفهمش..
علشان كده السيد المسيح قال "تعلموا مني لاني ...
متواضع القلب " (متي ١١ : ٢٩) ..

التواضع هو محبة الله متجسدة !!
يعني لو كان عندك حب قد الدنيا من غير قلب متواضع
و لا ح تفرق مع حد ..

متواضع مش معناه توعظ عن التواضع!!
انما يعني كلامك كله أدب و ذوق ..
يعني ما تزعلش حد و لا تزعل من حد ،
يعني سهل تصالح و تتصالح..

متواضع يعني مبتسم في وش الكل ،
يعني ما تسيبش حد وراك يشتكي منك ..

متواضع يعني ما تقولش و لا تكتب علي حد كلمة وحشة
مهما كانت عيوبه ، يعني شايف له عذر ،
ضعيف مغلوب من عيوبه، مظلوم في ظروفه أو طفولته..

متواضع يعني تعامل الكل باحترام و تقدير ،
احترام الكبير واجب، لكن احترام الإنسان البسيط
هو المحك الحقيقي ..

متواضع يعني ما تكسفش حد ، و لا تقلل منه
، و لا تجرحه .. لو حسيت ان كلمة قلتها عفوا جرحته
ترطب خاطره و تجبر مشاعره..
يعني تقدر مشاعر الناس و تبقي حساس ناحيتهم
، و تريحهم و ما تسيبش حد قدامك محتاج كلمة حلوة
و مشاعر جميلة و ما تديهالوش..

المتواضع سهل يقول "اسف ، حقك علي
، اوعي تزعل مني ، خاطرك غالي عندي" .
. المتواضع لما يلاقي حد زعلان يعاتبه بكل حب،
و لو لقي مفيش استجابة يبعد برضه بكل حب
، لكن عمره ما يغتابه أو يشهر بيه..

المتواضع منين ما يروح الناس تحبه لأنه جميل المعشر ،
لطيف الشمايل، خفيف الروح .. بيخللي الدنيا جميلة
، و الخدمة أجمل و العيلة اجمل و اجمل ..

المتواضع عاوز نعمة من ربنا علشان ده سر ربنا ببديه لحبايبه
، و لما يتواضع يدي له نعمة فوق نعمة ..