زوّادة اليوم: حلمك
بيخبرو عن حَي فقير كتير، الناس فيه محرومين من ابسط حقوق الإنسان. الولاد هونيك بيلعبو سوا و بيِحْلَمو سوا بحياة احلى. مرّة قاعدين الولاد عم يحكو كل واحد شو بيحلم يكون عندو و شو بيحب و صارو يقولو قصور و مصاري و شهرة...بس صبي زغير رسم عالأرض مخدّة كبيرة و نام عليها و قلّن انّو بس حلمو ينام عا مخدّة! صارو يضحكو عليه و قالولو انّو فاهم فكرة الأحلام و الطموح غلط! شو ما كان حلمك ان كان زغير او كبير و شو ما كان نَوعو ما تخلّي حدا يسَخِّفلَك طموحك! قد ما كان غريب لغيرك ما بيهم، هيدا حلمك انت و لازم تحارب كرمالو! قد ما كان الواقع صعب ما تقبل حدا او شي يسرق منّك حلمك. ربنا قلنا انّو ايماننا بيقدر ينقل جبال، من شو خايفين؟! سلمو سفينة حياتكن للرب و هوّي اكيد رح يوصّلكن عا برّ الأمان...الله معكن