منتدى الفرح المسيحى

https://upload.chjoy.com/uploads/156088716851861.jpg

بطلت أسال أسئلة من نوعية ليه يارب حصلى كده فى أمور معينة
، لكن بقيت بتعلم اعمل ايه فى اللى بمر به.
لما عرفت انى مسؤولة اقوم بدورى وبس.
وداه له شق ابحث وادور واتعلم وأقرأ
وداه مش محبب فى مجتمع ثقافته على السمع
وقالوا وقولنا وقالولنا
يعنى مش برمى دورى على ربنا بحجة الإيمان
وهو أصلا هروب من المسؤولية او على غيرى
لانى بدارى عجزى فيه وانا اصلا مش عاجزة بس دى الكدبة
.. (وداه لا يلغى الإيمان والثقة فى الله )
.. او( فى القوة العظمى التى تثق فيها)
عشان اكتشفت ان غالبا إجابة سؤال ليه؟
عندى أوعند البشر عامة بس ماحدش عارف
أو قائم بدوره ومستنى أمور خارقة للطبيعة تحصل
وهو قاعد مربع رجليه على كنبة بيتهم..
- يعنى ليه يارب الناس شريرة ؟ ليه حقى مش بيجيلى؟
ليه حصلى كده فى شغلى، فى دراستى؟
عشان ببساطة فى ناس قبلت وسكتت تقبل الظلم وشر غيرها،
من غير ماتعمل رد الفعل المطلوب
، انك تاخد موقف تغير فى ظروفك هو مسؤولية شخصية..
والناس اللى بتتصنف تحت عنوان (الشر،الظلم)
بقت كده لانها مالقتش حد يوقفها
، ايه اللى يخليها تبطل ظلم وشر !
اكيد مازهقتش من دورها لانه بيحقق لها مكاسب ...
ليه بقول الكلام داه لان فى شر ممكن يوقف
، لو انت عرفت دورك وقررت بشجاعة تعمله برغم خوفك
والشر داه ممكن يكون افكار بتتردد أجيال وراء أجيال،
وبيقولها ناس لها صفة العلم أو الدين
ومفكرتش تغيرها ومصدق فيها رغم الأذى اللى بتتعرض له منها.