منتدى الفرح المسيحى - كلنا هنمشي وهييجي اليوم ونسافر 🤲

منتدى الفرح المسيحى (https://www.chjoy.com/vb/index.php)

- قسم المواهب المسيحية (https://www.chjoy.com/vb/forumdisplay.php?f=147)

- - كلنا هنمشي وهييجي اليوم ونسافر 🤲 (https://www.chjoy.com/vb/showthread.php?t=627712)

كلنا هنمشي وهييجي اليوم ونسافر 🤲

كلنا هنمشي وهييجي اليوم ونسافر
ليه بتعافر في عالم هيئته زايل
ارفع عينك للسما قبل ما ييجي يسوع هنا
قبل ما ييجي اليوم تبقي عريان وحاير

تجري ورا لقمة عيش وفي الآخر هتلقي مافيش
حاجة معاك خدتها مهما سعيت فيها داير داير
كلنا هنمشي وهييجي اليوم ونسافر

خايف من بكرة ومن الامراض وكل ما تلقي فيك أعراض
تجري علي اطباء ودوا سلمها ليه وخليك شاكر
كلنا هنمشي وهييجي اليوم ونسافر

بتجري ليه ورا الميراث تخسر نفوس مش همك خلاص
اترك ردائك واتبعه ولضعف النفوس خليك عازر
ده بكرة او اليوم هنمشي نسيبها ونسافر

تجري ورا مجد الذات شهوة وغني ويا حاجات
اخرتها عطب ويا هلاك اهرب لحياتك من كل الدواير
كلنا هنمشي وهييجي اليوم ونسافر

عايش وعينك ع الاراضي بتملك فيها وبرضه مش راضي
عنيك ميملهاش غير التراب وناسي انك هنا زاير
ده يمكن ييجي اليوم نمشي ونسافر

تشتري متشتريش ميهمكش ده اللي اشتري قبلك مملكش
المهم تملك في سماه طول ما انت في طريقه ساير
كلنا هنمشي وهييجي ونسافر

يكفي في يومك كسوة وقوت وليه تعيش في ساقية مربوط
وتعيش يوم بعد يوم مضغوط وخاير
ده يمكن ييجي اليوم ومعاه نسافر

انتبه لحضوره معاك وانسي وياه اللي فات
وابتدي بداية تفرح السما ويتهد الساتر
ده يمكن ييجي اليوم نمشي ومعاه نسافر

تفرح تبكي دي ليها نهاية بالسما اهتف وقول ياهنايا
هييجي اليوم تفرح علي طول وتنسي احزان المغاير
كلنا هنمشي وهييجي اليوم ونسافر

الكلام ده عشانك وعشاني وليه يضيع سلامك وسلامي
علشان امور وقتيه الشيطان فيها بيعاير
ده كلنا هنمشي وهييجي اليوم ونسافر