منتدى الفرح المسيحى

https://upload.chjoy.com/uploads/155974280933511.jpg

كنت بعرفها من ريحة البيت قبل ما ابص في النتيجة الورق المتعلقة عالحيط
ريحة البيت صابون غسيل وكولونيا
ريحة سمن بيتبث في الدقيق والايدين الطيبة اللي ملمومة تنقش حوالين طبلية ستي
مكنة البسكوت الزهر وخناقة مين في الاحفاد اللي هيدور المكنة
ويتمتع بمنظر البسكوت النازل منها زي اطفال لسة بتتولد
الصاجات اللي بنأجرها من الفرن قبلها بليلة وتتنضف وتندهن زيت
ريحة الهدوم الجديدة اللي بتيجي قبل العيد باسبوع وافضل اقيسها كل يوم قبل ما انام
ريحة ملاية جديدة جدتي بتكون شايلاها عشان البيت يفرح زينا
ريحة الداير القماش اللي بنعلقه عالسرير ابو عمدان اللي اتغسل
واتعطر بالبخور فبقي كأن الورد المشغول عليه هينطق
مسحة البيت ليلة العيد بالمية والملح
ريحة قرص بلبن طالعة من الفرن راجعة البيت تضحك لأول كوباية شاي بلبن بعد صلاة العيد
صوت خروشة فلوس جديدة مستخبية في جيب جدتي مستنيانا
العيد مش ايام قد ماهو ناس وبيوت متونسة وعمرانة باصحابها
العيد ماجاش من 7 سنين يا جدتي