منتدى الفرح المسيحى - ما لوش مقاييس

https://upload.chjoy.com/uploads/155965102457731.jpg

الطول بيقيسوه بالمتر ، الوزن بالجرام ، السوايل باللتر، الزمن بالدقيقة ، و هكذا ..

انما فيه ناس ما لهاش مقاس معروف: لو جاملتها أو احترمتها تتبطر،
و لو حبيتها تكرهك ، و لو بعدت شوية تجيب سيرتك بالردي..
لو ضحكت معاها تستتقل دمك ، و لو كنت جد شوية تستتقله اكتر .
. لو قربت تبعد و لو بعدت تقرب ،
لو اكرمتها ما تشكرش، و لو اكرمتك تعايرك.. لو عملت معاها الواجب يبقي "حسنة و انا سيدك"
، و لو قصرت هفوة أو سهوة تفضحك.. لو كلمتها و ما ردتش يبقي مشغول
و لو كلمتك و ما رديتش تبقي ناقص أدب!!

الناس دي تدي للكلمة ١٠٠ معني و تركبك الغلط و تشكك في نيتك
حتي لو كنت مركب جناحين !! تزعل من اقل حاجة و ابسط جملة
، و سهل قوي تنسي لك كل حاجة حلوة انت عملتها..

ما تحيرش نفسك و تزعل و تستغرب و تشيل في قلبك ..

فيه ناس الدنيا تعبتهم و الزمن عياهم و الناس جرحتهم و خليتهم كده ..
و انا و انت ممكن نساعدهم بشوية حب و صبر .
. لكن باكد أننا مش مسؤولين نعالجهم علشان ما نحملش علي كتفنا حمل احنا مش قده ..

حبهم طبعا و طول بالك علي قد ما تقدر ، لكن فيه حلين تانيين:
يا تواجههم بأدب و حكمة لكن معاه كل حزم و الحسم و تحطهم عند حدهم،
يا تتجنبهم و تتجنب أذاهم النفسي ليك ، طبعا من غير ما محبتك تتغير ناحيتهم..