منتدى الفرح المسيحى - اللى يجبر بخاطر حد ربنا يجبر بخاطره

https://upload.chjoy.com/uploads/155369862753781.jpg

أجبر خاطر كل من يرجوك يارب ...
** أنا دكتورة شاطرة أوي في شغلها تعبت
كتير اوي لغايه ما وصلت استشاري دلوقت....
اتمرمط كتير ف الامتياز و النيابه .
.اتبهدلت ف الوحدات الصحيه و البيات بره البيت ف النبطشيات
ده غير تحكم الدكاتره الكبار فينا و ف اخر الشهر ناخد ملاليم....

قررت لما اكبر و اوصل أني اهتم بس بنفسي
و بالعيان اللي يقدر يدفع بس.
.كشفي ٤٠٠ جنيه بيجي العيادة يومياً اكتر من ٧٠مريض
( ما تحسبش عشان ماتتعبش) مواعيدي محجوزة ٤ شهور قدام...

المفروض ألف علي العيانين الصبح ف المستشفي الحكومي
لكن ألف ليه؟؟ مابيدفعوش حاجة ..انا بروح بس المستشفى عشان بريستيجي لاني رئيسه القسم الباطنه و العناية المركزة....

و لا يهمني مين اخد دواه ولا الرعايه الصحيه
ولا الآدمية حتي للمرضي
..و طبعاً دول اكتر مرضي محتاجين خدمه
عشان دول رجل بره و رجل جوه زي ما بنقول....

طبعاً معنديش وقت اروح كنايس
و لا حتي وقت استقبل حد يفتقدنا.
. بس ابونا مره أحرجني و قابلني ف الشارع
و قالي انا أجيلك بكره بس ١٠ دقايق...

أدي ٣ عيانين كشفهم ح يروح عليا
..و ح أتأخر ع الباقي!! و طبعاً الكهنه دول مَش بيقعدوا ١٠ دقايق
كده يبقي اليوم اتضرب و راحت الكشوفات كلها!! يادي الليله!!!!

المهم ابونا جه البيت و كان مستعجل
عشان عارف مواعيدي مزنوقه
حكي لنا قصه المفلوج بس ما تكلمش زي كل ما حد يتكلم عليها
و عن قوه ربنا و انه الاله القادر و الأصدقاء المخلصين...لا ....

هو قال جمله واحده بس " ربنا شفي المفلوج
عشان يجبر بخاطر أصحابه زي ما هما جبروا بخاطر صاحبهم"

طول السكه وانا سايقه للعياده افكر ف الجمله دي !!!
و ازاي كبيرة عند ربنا ان حد يجبر بخاطر حد
..و كمان ربنا يرد علي ده بنفسه!!!

يلا مَش مهم ..انا وصلت العيادة
يادوب ألحق الشويه الباقين م الليله!!!!

ياااااادي الليله اللي مَش فايته!!! ابونا تاني ف العياده.
..عاوزين ايه مني دول النهاردة...

طبعاً دخلته اول واحد عشان الاحراج
و كان معاه واحد من اخوة الرب حالته صعبه و مالوش حد...

بعد الكشف قلت لابونا لازم حالاً يتنقل العنايه
حالته ما تستحملش تأخير ..عشان اريح دماغي و أفك نفسي بقي !!!!

ابونا قالي أرجوكي اهتمي بيه ف المستشفي الصبح
لما تروحي ده مالوش حد ...

خلصت اخيراً اليوم الصعب ده و ركبت العربيه مروحه البيت
..فكرت ف الجمله بتاعة ابونا اللي جالي البيت
و ازاي اقدر اجبر بخاطر حد حتي لو عن طريق التجربة
و اشوف اللي ح يحصل....

غيرت اتجاه السواقه و سوقت طريق المستشفي بالليل جداً
و قلت اروح اطمن علي المريض
اللي مالوش حد اللي جالي العياده مع ابونا التاني....

كل المستشفي استغربت!! و التمريض مَش مصدق !!!
ايه اللي جابها دي دلوقت.... دي ما بتلفش ع العيانين الصبح !!
جايه وش الفجر عشان واحد غلبان كمان...

اهتميت بالمريض و أمرت له بعلاج مكثف بعد ما كان في غيبوبه
و قعدت جنبه ٣ ساعات لغايه ما فاق و بقي يتكلم...

و انا نازله مروحه و قبل ما أوصل لباب العربيه
أغمي عليا نتيجة جلطه كبيره مفاجأة!!!!

كل اصحابي الدكاتره جريوا عليا
و عملوا كل الإسعافات المطلوبه
و الادويه اللي الحمدلله دوبت الجلطه....

فيه واحد منهم قالي الجلطه دي لو كانت حصلت لك ف البيت
ما كنش ح يبقي فيه وقت حتي تتنقلي المستشفي
لانها كبيرة و في مكان قريب اوي م المخ!!!
انتي ربنا بيحبك عشان كنتي ف المستشفي!!!!!!

عرفت ساعتها معني الجمله اللي قالها لي ابونا ف البيت
اللي يجبر بخاطر حد ربنا يجبر بخاطره ...

ياااااه يارب عشان حاجة صغيرة انا عملتها ل مريض
و المفروض ده شغلي ..انت ترد بإنك تنقذ حياتي...
للدرجة دي يارب مهم عندك اننا نكون حنينين
و شفوقين علي بعض وسط العالم الصعب القاسي ده !!
و ان اللي يقدر يساعد يساعد بفعل بكلمه بإبتسامه بإهتمام بحب !!!
و ردّك يارب بيكون اضعاف اضعاف!!!!!

"من سعي بين الناس جابراً للخواطر..أدركه الله وسط المخاطر"