منتدى الفرح المسيحى - تحدي العشر سنين

https://upload.chjoy.com/uploads/154832755261561.jpg

تحدي العشر سنين 👉 منتشر بشكل كبير جداً على الفيسبوك
.. تحط صورتك من عشر سنين وصورتك دلوقتي.
عشان تشوف التغيير فى شكلك. وانا شايف انها فكرة حلوة ومش بنتقدها خالص .
والملاحظ ان معظم الاصدقاء بيبقوا عاوزين يوصلوا رسالة
ان انا دلوقتي صورتي أحلي من عشر سنين فاتوا .
وكأنهم عاوزين يقولوا احنا بقينا أفضل احنا بقينا احلي.
وده شيء جميل ان الواحد يحب شكله ويحب نفسه ويشوف نفسه بقي أفضل وأجمل .
لكن الاجمل ان الواحد يقيس نفسه من فترة للتانيه انا بَتغير ولا انا زي ما انا..
فى كل سنة هل بيبقي فيه تغيير فى حياتي ولا انا بتاع كل سنة.
الحكومات دايماً بتعمل فيما يسمى بالخطة الخمسية..
يعني خلال خمس سنين هعمل وهكمل مشروع معين.
ولازم يكمل ولو ماكملش ده يبقي من علامات الفشل.
كل واحد فينا محتاج يسأل نفسه خلال عشر سنين فى حياتي ايه اللي اتغير ؟
وايه اللي محتاج تغيير ؟
وهل اللي اتغير نتيجة جهد وخطة وبذل مني ولا اتغير بطبيعة الحال نتيجة عوامل خارجه عن إرادتي؟
هل صورتي الحلوة اللي الناس شايفاها هي كده فعلاً !
ولا نتيجة مكياچ وكاميرا كويسه ؟
محتاجين نفكر بعض باستمرار ان حياتنا هي مجموعة ساعات وسنين
(مجرد وقت) لو ما تغيرتش للأفضل مش هتسيب بصمة
. شكلك الحلو ودقنك الجميلة ولون شعرك اللي يجنن بيبهر الناس
لمجرد وقت وبيفرحك كمان لمجرد وقت..
كلنا محتاجين نظرة اكبر وأعمق في تقيمنا لعشر سنين في حياتنا.
لان الحياة مافيهاش عشرات من السنين كتير.
ودايماً طريق التغيير للافضل هو التحدي الاصعب والاكبر
. اتحدي الظروف واتحدي الواقع ونقابلك كمان عشر سنين وانت اجمل وأحلي 😊