منتدى الفرح المسيحى - ما تتحمقش قوي

https://upload.chjoy.com/uploads/154819558546051.jpg

لما تسمع مشكلة بين اتنين،
بتلاقي نفسك لأسباب كتيرة "اتحمقت" لواحد فيهم ..

جايز لأن مشاكله زي مشاكلك ، ممكن ..
و جايز لأنه عرف يستعطفك و يحكي لك مشكلته ببراعة ..
و جايز لانه جه الأول و سمعته قبل الطرف التاني
، اللي عقبال ما جه يحكي كنت اقتنعت و تفاعلت و بقي صعب عليك تتراجع في رأيك ،
و الحقيقة بتقول ان اي مشكلة سييها الاتنين مش واحد ابدا !!

و جايز لأنك بيصعب عليك الست اكتر من الراجل أو الراجل اكتر من الست (علي حسب طبيعتك) ..

المهم لما تعمل كده ح تعمل شوية غلطات ..

اولهم أنك مش ح تبقي حكم عادل و ح تطلع قرار غلط ..
كمان تعاطفك الزيادة ح يعلم اللي قدامك الصعبانيات
و مش ح يحاول يحل مشاكله و يواجه عيوبه ،
و بدل ما يصلح نفسه يكره الطرف التاني ..

نقطة مهمة تالتة : ح تخسر الطرف المظلوم بتعاطفك الزيادة
و ممكن بسبب كده يكرهك و المشكلة تتضاعف..

آخر نقطة و دي غريبة جدا ، بس بتحصل كتير أن الطرفين يرجعوا لبعض و يحكوا لبعض التفاصيل،
و يصطلحوا و الاتنين يبعدوا عنك خالص: واحد مكسوف منك و محرج يرجع لك
، وواحد غضبان منك و مانع الطرف الاول يرجع يكلمك،
و حالف كمان علي نفسه ما يرجع لك ..

الخل خليك عادل بين الناس و اوعي تقول علي حد كلام يتمسك عليك ..

مش كده ، و لا إيه؟؟