منتدى الفرح المسيحى - كوكب القصرالعيني

أنا ف المستشفي قابلت (اصحاب المفلوج اللي نزلوه م السقف) !!
شباب جايين يجروا بصاحبهم و متجننين من الخوف عليه بسبب دور برد..

https://upload.chjoy.com/uploads/154498431454181.jpg

و ف نفس الوقت قابلت (اخوات يوسف) !!!
واحد بيغسل كلي اهله راميينه ف المستشفى لوحده عشان 'بيقرفوا' منه ومن جو المستشفيات!!!

https://upload.chjoy.com/uploads/154498449478851.jpg

*******
أنا ف المستشفي قابلت (قايين) !!
شوفت واحد بيموت عشان محتاج كيسين دم واخوه مستخسر يتبرعله عشان خايف علي صحته....

https://upload.chjoy.com/uploads/15449846144861.jpg

بس ف نفس الوقت قابلت (راعوث) !!
بنت مستعدة تدفع كل اللي معاها عشان تلاقي سرير رعاية بس "لحماها"..ابو جوزها اللي مات!!

https://upload.chjoy.com/uploads/154498470580131.jpg

*******

انا ف المستشفي قابلت (ألقانة زوج حنة أم صموئيل)!!
راجل ٨٠ سنة مستلف ٥٠٠ جنيه حق المواصلات عشان بس يجى من اسيوط يعالج مراته...

و ف نفس الوقت قابلت راجل متعصب جدا انه اشترى دوا لبنته ب٣٠ جنيه وقرفان منها و بيتمني تموت!!!

*****
انا عيشت و شوفت الناس اللي فضلت اقرا عنهم ف الانجيل من يوم ما اتولدت!!!
قابلت ناس بتحب باللسان و الكلام و بس...و ناس بتحب "بالعمل و الحق"!!!

انا ف المستشفي عرفت ان القصص دي ماطلعتش خيالية ولا حواديت بتتحكيلنا...
الناس دي طلعوا بجد و موجودين بينا و وسطنا!!

الناس دي مش ناس وهمية بنقرا عنهم وخلاص...
الناس دي يمكن يكونوا احنا و احنا مش دريانين!!