منتدى الفرح المسيحى - زوادة اليوم : الرّوتين

زوادة اليوم: الروتين

بيخبّرو عن أصدقاء تنَين، الأوّل من اليابان والتاني من الهند، التقو بالجامعة بأميركا... خلال الفرصة، الياباني بيعزُم صديقو ليزورو ببلدو، وهيك بيصير، بس المفاجأة إنّو هِنّي وناطرين التران بيصِفّ بعيد عَنّن حوالى خمس متار، بيقوم الهندي بيمزح مع صديقو وبيقلّو: «معقول التران عندكُن بيوقّف بعيد عن المحطة خمس متار»؟... الياباني بيخجل وبيعتذر من صديقو وبيقلّو: «بوعدَك هالشي ما رح يتكرّر»... بسرعة بيتوجّه لعند المسؤول وبيعبّرلو عن إنزعاجو، المسؤول بدورو بيعتذر من الشبّ الهندي يلّي بيجرّب يقلّو إنّو كل القصة مزحة، وهيك شغلة بتصير بكل البلدان بَس الشبّ الياباني أصَرّ إنّو هالمزحة مش مقبولة...
الزوّادة بتقلّي وبتقلّك...
في إشيا كتيرة بالبلد هيّي غلط، بَس لأنّو صارت جزء من حياتنا اليومية وتعوّدنا عليها صرنا نحسّها عادية ومزبوطة، إذا بدنا نعطي أمتال ما منخلص! خلّينا اليوم ما ننجرّ ورا تقاليد وعادات العالم وننسى إنّو القانون الوحيد اللي لازم نطبّقو هوّي قانون المحبة... والله معكن...
https://a.top4top.net/p_930ukgnx0.jpeg