منتدى الفرح المسيحى - النفًقًات الصغيرة

https://upload.chjoy.com/uploads/1528789336321.jpeg

أعتقد سبب مهم في بؤس الأنسان المعاصر حاجة انا بأسميها (النفًقًات الصغيرة)

اللي هي الأكاذيب اليومية البسيطة اللي من كتر ما هي تلقائية أتحولت لعادة طبيعية في الأنسان ..

زي الردود الجاهزة بتاعة ( انا بخير ، الدنيا ماشية ، كله زي الفل ) و السلوكيات المحفوظة زي الابتسامه في وش حد انتا مش طايقه أو العكس السكوت اللي غصب عنك في وش حد نفسك تكلمه كل الكلام اللي في قلبك ..

و حاجات تانية كتير الأنسان بيعملها و هو علي إدراك تام و وعي كامل انها ضد قناعته و غير معبره خالص عن طبعه و جوهره

و الحقيقة انتا مش عارف بتعمل كدة ليه ؟؟

يمكن عشان تشتري دماغك و تكمل يومك التافه المزري ..

أو يمكن لو معملتش كدة حتواجه احتمالات انتا أضعف من انك تتحمل مسؤوليتها ..
بس اللي بيحصل في اخر اليوم ان كل (النفًقًات الصغيره) الحقيرة ديه بتتجمع جواك و تعمل زي حائل معتم بين مشاعرك الحقيقية و السلوكك الواقعي ،

زي صب خرساني تقيل اوي قادر ياخد روحك الطايرة و ينزل بيها لأحط أرض ! ..

فهل انتا أجبن من أنك تقول اللي جواك ؟ بس بتبقي جبان عشان خاطر مين ؟!

طب حتقدر تدفن اللي جواك ده لغايه امتي ؟؟!

و انتا اصلا في وسط ناس مش همهم يبذلوا اي تعب عشان يوصلوا للي جواك !؟

و تفضل (النفُقًات الصغيرة) ديه تشوه فيك لغاية ما تبقي مغطية كل جزء في كيانك ،

تبقي بتتنفس كدب و بتحلم كدب !..

تتحول تدريجيا لكائن تاني غير اللي جواك ، مش قادر تصدق اللي بتقوله او ترضي عن اللي بتعمله أنما مدفوع علي البقاء بدافع المظهر الاجتماعي و الشكل العام ...

كائن بيبص لنفسه انه مسلوب الأصل و القيمة ..

كائن الناس بتتعامل معاه علي انه مفرغ من المعني و الاعتبار ..
cpd