منتدى الفرح المسيحى - دبر حياتنا بالى تشوفه

https://upload.chjoy.com/uploads/1525505034771.jpg

كتير بلومك ،وببصلك بعينيا مش بنطق .
وبفضل اقولك ليه بفضل اعاتبك ،وشريط شغال ف خيالى من مقارنات من استفسارات من اسئله مش بلاقيلها اجابات ؟
كتير ببصلك وبقولك وانا ساكت انى راضى بأقل حاجه بس ادينى الحاجه دى . طيب سهل ليا السكه دى طيب اشمعنى الموضوع ده بالذات . كتير بقولك انت شايف انت عارف مش محتاج انى اقولك لانك انت بس اللى حاسس اصلك مش بتفارقنى . معايا كل لحظه حتى لو نمت مش بتسبنى ..
وارجع بعد كل ده ألوم نفسى واقول ازاى اقولك كده دا انت ياما سترت عليا وكام الف محنه وضيقه وفكتها وياما وقعت وقومتنى . برجع ألوم نفسى ازاى اتجرأ واقولك ليه واشمعنى مع ان التعب فيا ماقلش كأنك بتشيل من ناحيه وبيزيد من الناحيه التانيه !!
صراع مر وعقل متعب برغم ان العقل ده نقطة فى محيط حكمتك . لكن بسماحك خلتنا نفكر ونقول ليه وكمان نتجاسر ونشاركك الحلول .. طيب هو ده معقول هو ينفع مشلول يقوم نفسه ..
عقل متعب متعب جدا ..
اصل احيانا بيخلينى اقول طيب يارب ماتمشيها حتى نص نص .. اصل المحتاج حاجه اوى هايوافق بالنص نص .. يعنى اللى عايز شغلانه كويسه والقاعده طالت هايوافق بالنص نص .. اللى عمرهُ كله فى امنيه واحده والمده زادت هيوافق لو هايعيشها نص ما اتمنى .. اللى عايز ينجح وحياته بتفشل هايوافق لو هاتبقى مقبوله .. بس ارجع واقول لا مش معقوله
اصلك انت يارب مش بتاع النص نص ولا اللى يمشى الحال انت اله الكمال وكل حاجه عندك حتى لو شايفينها متعبه هى اكيد لخيرنا .. سامحنى غصب عنى صراع بيتعبنى بس قبل مابيغلبنى بجرى قوام واشوف اللى فات من حياتى وبشوف مهما كانت صعبه فمن غيرك كانت هاتبقى مستحيله ..
دبر حياتنا باللى تشوفه
وعقلنا ده مهما كان
فالاخر بيجى لحكمتك ويدارى كسوفه
وجهله وقلة حيلته ..
وارجع فالاخر وبقولها وانا محتاجها
فلتكن مشيتك ..