منتدى الفرح المسيحى - بلاش نوصل ليأس يهوذا

https://upload.chjoy.com/uploads/1525388064711.jpg

موقف حصل بالفعل
مره حصلت حاجه وجعتنى اوى من جوه ومكنتش قادره اتقبلها بالرغم من انى كنت قدام الكل حديد ولانى كنت وقتها لسه صغيره وماكنتش لسه علاقتى ببابا اللى هى يعنى المهم انا قررت انتحر وبالفعل بدأت فى تقطيع شراين ايدى بالموس بس كانت فيه حاجه جوايا عكسى وانا بقطع كانت بتصرخ وتقول لا يارب مش عاوزه اموت بس كان شيطان عقلى بيقولى اتكلى على الله خليكى تخلصى وترتاحى .
الموقف خلص على انى فعلا قطعت ايدى لكنى ما موتش
ساعات الشيطان بيضلم الدنيا فى وش الواحد فى سبيل انه ييأسك ويبقى كدا هو ملكك وعرف يمرمطك ان عرفت تحارب يبقي انتصرت او على الاقل حاولت انا كان جوايا صراع بين روح الله اللى ساكن جوايا بما انى هيكل ليه وبين شيطان عقلي اللى يأسنى وحلالى فكره الانتحار وقتها انا روحت واعترفت بجريمتى فى حق ربنا واستغربت جدا لرد فعل ابونا من كلامى لما قالى ان مافيش حاجه تستاهل انك توصلى لكدا خليكى ريلاكس خالص انت لسه صغيره وياما هتشوفى انا دلوقتى كبرت وبالفعل شوفت بس اكيد اتعلمت اتعلمت ان صوت ربنا جوايا بيقولى اتحملى لانى لسه عاوزك وساندك اتعلمت لما روحه بتقولى هتدفنينى معاكى ومش هعرف اقوم جواكى ولا اقومك اتعلمت لما بحس ربنا اللى بقى بابا بيقى يقول الصعب معايا هيعدى وهتاخدى منى افراح اكتر من احتمالك .
بلاش نوصل ليأس يهوذا لما شاف نفسه ملهوش رجاء
وخلينا نوصل لعشم ورجاء ديماس على الصليب مع ان ديماس كان المفروض ان يأسه عظيم بسبب عظم اعماله الاثمه لكن ختمها بسرقه الملكوت
بابا مهما شوفت الدنيا سودا بينورهالك لو بشعاع صغير ولو شوفت ان الببان كلها مقفوله هو بيفتحلك بدلها ابواب يمكن يكون متاخر يمكن يكون مش باين يمكن يكون نايم زى ماكان في السفينه ومستنيك تصحيه المهم انه موجود وانت لازم تدور وتعرف وتكتشف سر تاخيره ايه .
هل عاوز يغيرك - ولا عاوز يعلمك - ولايفلترك - ولا عاوزك تكتشف نفسك الحقيقيه .
مواقف كتيره بعد مابتعدى بنستغرب نفسنا فيها ازاى كنا كدا وقتها والحقيقه ان نعمه ربنا اللى فينا هى اللى خلتنا نعديها ونقوه بيه .
احذروا من اليأس لانه ابو كل فشل وخساره روحيه وماديه وانسانيه