منتدى الفرح المسيحى - انتى مش فاشله في الحُب ....

https://img1.mrkzgulf.com/i/00127/77g5anwvvxe8.jpg

بصى بقى إنتى وهي :

انتى مش فاشله في الحُب ؛
ولا مريضه نفسياً ولا مُصابه بهوس الفقد انتى بس اللى حظك سئ بتقابلى في حياتك ناس عبارة عن " فخّ " ..

يا إمّا شخص "جعان عاطفة" فَـ بيمتص كامل طاقتك في الحُب بتكونى مُطالبه إنك تهتمى وتحبى وتضّحي و هو بيقوم بدور "المُتلقّي " وبس ....
أو بتقابلى حد خربان من جوّاه ؛فاقد الثقة في أي مخلوق ..
وانتى تفضلى تعاني عُمرك كله في إثبات حُسن نيّتك و صدق قلبك تجاهه ..
وتصلّحى اللىّ خِرب عنده على ايد ناس قبلك ..
و بتتعبى عشان تعلّميه يرجع للدنيا ويتولد على ايدك من جديد ..

يا إمّا بتتكعبلى في الشخص " المقشّف " عقلياً و ذهنياً؛
اللي على قلبه كميّة تراب و عَفَرة من زمان ..
مالقاش حد يفهّمه إزاى يتنفّس حُب و إزاى يطوّر من رماده ويحوّله لِـ ماس ..
ازاى يعشق ويتعشق .." يَمنَح و يُمنَح "

يا بتقابلى معدوم الإحساس والإحساس ده الشئ الوحيد اللّي وراثي جيناتي بحت ،
لا ينفع حد يتعلّمه ولا يعلّمه ..
مش منهج ينفع يتدرّس جوا فصل ..و ده " ثبات شعوري " .. مفيهوش مناقشات

يا بتقعى في حد كل شغلته في الحياة " الكلام وبس "
فاكر إن أغانيه بتحوّلك لمقطوعة موسيقية سهلة العزف ..
و ده حد موهوم و محتاج يتعالج عاجلا ..!!

بص يابنى منك لهو :
البنات عندها قسم خاص فيه أنوثة و طفولة و دلع ياخدوا العقل ،
بيتم فتحه مش لما تحب زي ما أنت فاكر ،
لا بعد الإرتباط و ثقتها إن الطرف التاني مُـتيم بيها ،
لإنها بتخاف علي مشاعرها و كرامتها جدااا ،
ليها حق ما هي هتبقي جنة الأرض للي يصونها و يحبها