منتدى الفرح المسيحى - يسوع يملا العين

https://upload.chjoy.com/uploads/1516543446691.jpg

و لما تعاشر "الأبرع جمالاً" لوحدك هاتبطل "عَك" ولملمة من الشارع..
ولما عينك تشبع بملامحُه.. هاتلاقيها تبطل تزوغ وتجري ورا مناظر وخيالات مُتعبة زي الاول، وده هايحصل بس مش بمجهودك لكن دي نتيجة طبيعية لعشرتك معاه..

ومع الوقت هاتتفاجئ بنفسك بقيت هادي.. مطمّن.. مش جعان وشحات زي زمان، وده لأنك جربت تعيش معاه وجوا حضوره ولقيت نفسك مُكتفي وشبعان بزيادة..

اصل ماينفعش تعرفُه وماتحبّوش..
ماينفعش تعاشرُه وماتنبهرش بيه..

أصل هو مُبهر ويملا العين..
هو جميل الملامح والصفات..
هو نقي وراقي اوي في تعاملاتُه ..
هو مُريح وبسيط من غير تعقيدات كتير .. وفي نفس الوقت امين و "جَد" أوي في كلامُه ووعوده مابيرجعش فيها مهما حصل..
هو مُختلف بكُل المقاييس ..
هو شخص مايتزهقش ومايتملّش منه ومن اكتشافُه..

عشان كدة محدش عرفُه وحبُّه بجد.. وقدر يبعد أو يستغنى أو يلاقي البديل .. لأنه فعلاً "يملا العين"..

#يسوع
#يملا_العين