منتدى الفرح المسيحى - كان لازم "بَتر" عشان تفضل عايش

https://upload.chjoy.com/uploads/1516316905721.jpg

ولما تقرب أكتر هتكتشف ان الله أحن وأطيب بكتير مما تخيلتُه ..

وأن كل وجع سببهولك مكنش قاصد يكسرك بيه، وأنه كان هدفُه مش أنه يموّتك،

لكن بس يموّت "الموت" اللي جواك ..

وأن عملية قطع واستئصال حاجات كانت مهمة في نظرك وماتقدرش تعيش من غيرها ..

كانت خطوة اساسية لازم تحصل.. لأن الموت اللي جواك كان بيستخدمها وبيسرق بيها حياتك زي السرطان مش بيُقف .. وللاسف كنت وصلت لمرحلة ماينفعش فيها مُسكنات خلاص ..كان لازم "بَتر" عشان تفضل عايش ..

وانه لما قطع عنك "مُخدراتك النفسية" وسابك تصرخ وتبكي اوقات كتير من غير استجابة، كانت هي دي نَفسها الاستجابة وكان هو ده علاجك الوحيد عشان تفوق من وَهم أنك كويس ومش محتاج تتغير أو تنضف .. فا تصرخله يغيّرك بجد..

وكل ما هاتقرب منه أكتر، هاتكتشف قد ايه أنت محدود ورؤيتك ضيقة وبتبُص دايماً تحت رجليك

.. وقد ايه هو صالح مابيغلطش.. وقد ايه هو فاهم بيعمل ايه وامتى بالظبط

.. ولأنه بيحبك بجد عمره ما عمل او هيعمل حاجة مش هدفها خيرك في النهاية .