منتدى الفرح المسيحى - لو ماعملتش اللي انا عايزه تبقي مذنب

https://a.top4top.net/p_733t2mqt1.jpg

بعد كل اللي عملته عشانك تخذليني بالشكل ده؟
ما أنت لو كنت بتحبني كنت اتغيرت عشاني..
انتي مش بتسألي عليا ولا تكلميني ..

هو انا خلاص مابقاش ليا لازمة في حياتك؟
ليه مش بتسمعي كلامي هو انتي مش بتثقي فيا؟
مابتجيش تزورني حتي وانت عارف اني تعبانة..
لو ماسبتيش شغلك عشاني تبقي مابتحبنيش..
هطفش و مش هتعرفوا مكاني..
ايامي في الدنيا بقت معدودة..
حياتي وحشة من غيرك..
ماحدش بيراعي نفسيتي..
الدنيا مابقاش ليها طعم من غيره..

الكلام ده بنسمعه كل يوم من أقرب الناس لينا.. كلامهم بيحسسنا بالذنب وبالتقصير..
ساعات بنهرب من الناس و من مكالمتهم او مقابلاتهم عشان مانتضغطش نفسيا بسببهم..
وساعات بنستسلم ليهم وبنسمع كلامهم ونعملهم اللي هما عايزينه..

في الحالة الاولي بنخسر الناس دي.. وفي التانية بنخسر نفسنا..
الحالة ده علميا اسمها Emotional" "manipulate..
يعني استغلال او التلاعب بالمشاعر..
والناس بتستخدم الطريقة دي سواء بوعي او بدون وعي عشان تضغط علي مشاعرك بطريقة معينة بالتالي تتحكم في سلوكياتك لمصلحتها الشخصية..
والنتيجة انك بتلاقي نفسك وقعت في فخ اسمه
"لو ماعملتش اللي انا عايزه تبقي مذنب و مقصر او خاين او ماتستاهلش"

طيب لو انتي ذات نفسك اللي بتستخدم الاسلوب ده مع أصحابك ، جوزك ، مراتك او اولادك؟
لازم تعمل وقفة مع نفسك و تعرف ان مفيش حد مسئول عن مشاعرك غيرك انت..
ماينفعش تلوم اي حد في الدنيا علي مشاعر سيئة انت حسسها..
ماينفعش تضغط علي اقرب الناس ليك وتحملهم مسئولية حزنك و خوفك و قلقك ووحدتك..
ماينفعش تتحكم في سلوكياتهم عشان مصالحك الشخصية..
ماتتكسفش تطلب مساعدة من متخصص عشان تتخلصي من العادة دي..
وتعرف تتحكم في المشاعر السلبية اللي جواك زي الخوف والقلق وعدم الأمان.