منتدى الفرح المسيحى - لو قررت توصف 2017 هتقول إيه

https://www.mrkzgulf.com/e2r6l42f0wmc

لو قررت توصف 2017 هتقول عليها إيه؟!
اتعودنا في نهاية كل سنة إننا نقعد نفكر ونقيّم السنة دي كانت إيه بالنسبة لنا ونشوف هي فعلًا سنة كويسة ولا من السنين الصعبة اللي في حياتنا ولا زيها زي أي سنة بتمر علينا وأهي أيام وبتعدي؟

وأنا بالنسبة لي كانت ٢٠١٧ من أصعب السنين اللي مرت في حياتي من فقدان ناس غاليين عندي وصدمتي في ناس تانيين وعدد مرات كبير من خيبات الأمل لا بأس به، قعدت أفكر إزاي كل الحاجات دي حصلت في سنة واحدة؟ طب إزاي أنا لسه عايش ومكمل حياتي وقادر أكتب الكلام ده دلوقتي أكيد في سبب مخليني أعمل كده بالرغم من كل اللي حصلي ده أنا قادر أكمّل.

لما قعدت أفكر لقيت إنه فيه أكتر من سبب أهمهم إرادتي إني مش هتكسر وهكمل مهما كانت الظروف وسندة ومعية ربنا في كل موقف صعب كنت بقف وبصرخ فيه وأقوله ليه، كفايه أوي كده، ليه مش بتتدخل، الحقني أرجوك بلاقي سندة وتشديد وكأن إيده بطبطب عليا.

فكر بطريقة مختلفة:-

أنا مش عارف السنة دي مرت عليك إزاي، ممكن تكون كانت كويسة وممكن تكون زي حالاتي كده، علشان كده أشجعك تفكر بطريقة تاني مختلفة، يمكن محتاج تاخد خطوات معينة تكمل بيها شموارك ، يمكن محتاج تقف مع نفسك واقفة تعيد فيها حساباتك، والسندة اللي الله بعتهالك عن طريق ناس يقفوا في ظهرك ويشجعوك وهو بيقولك أنا مش هسندك نفسياً وروحياً بس ، دا أنا كمان هخلي أولادي على الأرض هنا يساعدوك ويكونوا السند الحقيقي اللي تقدر تشوفني فيه، علشان تطمن إني معاك.