منتدى الفرح المسيحى - مش شرط ( جواز = سعادة ) ..!

https://c.top4top.net/p_723jifkf1.jpg

كل بنت لما بتوصل لسن معين بتنضج فكرياً وعاطفياً ..
السن ده بيختلف حسب هي إمتى هتتخلص من فكرة إن الجواز هو هدفها الوحيد ورسالتها في الحياة وإن بمجرد وصولها ليه يبقى هي كده نجحت في تحقيق ذاتها..!

النضج ده ممكن توصله لما تتجوز وتعرف إن وراها حاجات تانية وإن مهمتها مانتهتش..
وممكن توصله لما تكبر في السن شوية وتحس إن الجواز مش أولوية في حياتها سواء فهمت من نفسها او بسبب ضغوط المجتمع عليها بإطلاق مصطلح العنوسة أو تخويفها إنها ماتتجوزش مثلاً ..
وممكن توصله في سن صغير ودي بتبقى أكتر واحدة محظوظة وإختياراتها وقراراتها بتبقى أقرب للصواب ..

النضج بيتم بالتخلص من قيود المجتمع اللي بتخلي البنت همها الوحيد في الحياة هو جوازها ..
سواء الأهل أو الأغاني والمسلسلات والأفلام اللي بتشكل فكر البنت من طفولتها على إنها مجرد عروسة صغيرة مهمتها إنها تلبس الفستان الأبيض..!
النضج هو إن الواحد أو الواحدة يقتنع إن الحياة مش واقفة على هدف واحد..
ولا إن السعادة بتتحقق بهدف واحد .. الحياة كبيرة أوي وأهدافها كتير ..

خلينا متفقين إن الجواز مهم للراجل والست وسبب من أسباب الإستقرار النفسي والعاطفي بس مش شرط ( جواز = سعادة ) ..!
الجواز ممكن = تعاسة أو كآبة أو ضغط أو إنفصال او حاجات تانية كتير ممكن ماتكونش سعيدة..

مين اللي حصر السعادة في الجواز بس أو مين ضامن إنه يكون سعيد لو اتجوز؟!
البنات عشان كائن عاطفي بتميل للحاجة اللي كلها عواطف وبتفتكر إن ده هو السعادة الوحيدة والأبدية ..
لكن الحقيقة هي إن الجواز حاجة واحدة من مليون حاجة ممكن تكون سبب من أسباب السعادة سواء زي الدين والأهل والصحاب والشغل و والكتب والفلوس والمشاريع وطبيعة وفسح وجو.. إلخ..
مليون سبب للسعادة نقدر نعيش بيه..
غبي أو غبية اللي تربط سعادتها بحاجة واحدة فرضها عليها المجتمع ..

ده غير إن الجواز ملهوش سن معين ولا هو قطر وبيفوت ..
ممكن يجيلك في أي وقت.. أهم حاجة يكون وقتها عندك النضج الكافي إنك تختاري صح عشان يكون سبب من أسباب السعادة مش تحوليه بسبب إختيار غلط بسبب إنك عايزة تتجوزي وخلاص وتخليه سبب من أسباب تعاستك ..
وقتها هتنضجي بردو بس متأخر..!

دوري على سعادتك في كل حاجة حواليكي..
وماتحققيش هدف المجتمع هو اللي فارضه عليكي ومهيألك إنك ملكيش غيره ..
اعتبري الجواز سبب من أسباب كتير لسعادتك أهم حاجة لما تجيلك فرصة إختاري صح وبمزاج عشان يكون فعلاً سعادتك..