منتدى الفرح المسيحى - ماتصدقش غير اللي تشوفه بعينك

https://upload.chjoy.com/uploads/1513852808091.jpg

كنت نازل اسحب فلوس من ATM
ركنت العربية صف تاني قدام البنك ونزلت على اساس اني هاسحب على طول وهمشي
ولما وصلت لقيت مكنتين
واحده عليها طابور والتانيه مفيش عليها حد
عملت ناصح زي اي حد وسألت هي دي بايظه !!
قالولي مافهاش فلوس
فوقفت في الطابور
وكل شوية حد يجي يسأل هي بايظة ولا ايه
نقوله مافهاش فلوس
فايقف في الطابور
جه امين شرطه محترم ولزقلي مخالفه محترمه
سبت مكاني وجربت عليه اقوله انا دقيقه وهامشي
لكنه طلع من الشرفاء ومرضيش يتهاون 🙈🙈
استعوضت ربنا ووقفت تاني في الطابور
وكان اول واحد بيسحب تقريبا اول مرة يتعامل مع المكنه ومش فاهم حاجه والمكنه طلعتله الكارت يجي عشر مرات ويدخله تاني
المهم جه واحد دخل على الماكنه البايظه ومن غير مايسأل الناس
دخل الكارت وسحب فلوس ومشي
كلنا بصينا لبعض
وبدأنا نقول مين اللي قال مافهاش فلوس
فطلع الشخص اللي واقف في اول الطابور ومعطلنا معرفش يسحب ففكر انها مافهاش فلوس ،، فقال للي وراه .. واللي وراه قال للي وراه وهكذا

يعني انا اتضريت وخدت مخالفه واتعطلت بسبب اني سألت الناس وصدقت كلامهم
والناس للأسف بتمشي ورا بعض من غير ما تتأكد
وطلع اللي ماشيين وراه " مابيفهمش " في النوع ده من التكنولوجيا

خلاصة الكلام
ماتصدقش غير اللي تشوفه بعينك
ماتمشيش ورا كلام حد بطريقة مطلقه
ماتخليش حد " اعمى " يقودك
خلي كل تفاصيل حياتك نابعه من اقتناعك مش من رأي الناس
علشان ماتتعطلش ولا تاخد مخلفات ولا تلبس ف الحيط
قيس على كلامي كل حاجه في حياتك
علاقات اجتماعية وعاطفية واسرية وعملية
فكر في اللي تسمعه ، وصدق اللي تشوفه