منتدى الفرح المسيحى - سيبك من الدوشة عشان تسمع صوته

https://upload.chjoy.com/uploads/1513183291581.jpg

أكيد جَرَبت إحساس إنك تبقي بتكَلِم حَد وهو مش مرَكِز معاك!

صوت التليفزيون عالي جدًا أو حاطِت سماعات في ودانه وسامعَك بالعافية..

المُشكِله إن الرد إللي هيرُده عليك غالبًا هيكون علي أد إللي سِمعه، ولو طلبت منه حاجة يعملها هتكون في حدود المعلومات اللي وِصلِت له من كُتر الدوشة إللي حواليه!

أعتقد إن حياتنا مَليانه بالأصوات العالية إللي بتخَلينا يا إما ما نسمعش صوت ربنا من أساسه، أو السَمَع بيكون مُشَوَش وعلشان كده تَصَرُفاتنا وردود أفعالنا بتكون علي أد إللي سمِعناه.. أو إللي ما سمعناهوش أصلًا!

إلهنا إله علاقاتي .. إله مُتَكَلِم .. إله عايزنا نسمعه علشان نِعرَفه ونحبه ونعيش معاه علاقة صداقة تخلينا نمشي في مشيئته بإرادتنا.. مِش بالعُنف ولا بالقسوة ولا بإنه يلغي عقولنا وإرادتنا، لكن للأسف الدوشة العالية إللي في حياتنا مش بتخَلينا نسمَع هَمَساته!

حياتنا مَليانة بدوشة الأصحاب والعيلة والشُغل والإلتزامات والمشاكل .. لو بَس نُدرِك إننا لو وَطينا صوت الدوشة دي شويه هنسمع صوته، هنلاقي إنه عنده حَل ونصيحة وفِكرة وضِحكة وحاجات كتير تخَلينا نعيش مُستَمتعين بالعلاقة معاه..

هنِكسَب أحَن أب وأوفي صديق وأحكَم مُشير وأرَق حبيب!