منتدى الفرح المسيحى - دوروا على الناس الحلوة

https://f.top4top.net/p_70647qt71.jpg

وانا قاعدة في الصيدلية ،،
دخلولنا واحد ومراته حامل وميعاد ولادتها كمان ٣ ايام ،،
كمية الحب وأنه نفسه يجيبلها كل حاجة عاوزاها علشان يفرحها لدرجة أنها بعد ما خلصت حاجات البيبي ابتدت تدور على حاجات ليها بس الفلوس مقضتش ،،
ف هي قالتلى خلاص يادكتورة ندور في البلد ،،
فقالى هو لا ياست الدكتورة كل اللى هى عاوزاه شوفهولها وانا بكرة هاجى اخدهم ،،
واكتشفت بعدين أنه ده الطفل التالت ليهم ،،
مع انى كنت فاكراهم لسه اول بيبي من كتر المحبه اللى كانت باينه عليهم ،،

ودخلولنا برضه واحد ومراته ،، كل ما تسال على حاجة يزعق فيها ويكسفها ،،
وهى تفضل تحاول بصوت واطي وهى مكسوفة ،،
وفين وفين لما قرر يتكرم عليها ويجبلها حاجة واحده وهو متكدر ومكدرها وكدرنا كلنا ،،
وتطلع أن الست حامل في خمس شهور وانهم متجوزين جداد مكملوش سنه ،،

العطاء حقيقي نعمه كبيرة ،،
ومش عطاء الفلوس لأنه ده ممكن يتعمل بطريقة مقرفة وكأنك بتشحت اللى قدامك وانت مغصوب عليك ،،
انما العطاء الحقيقي هو اللى بتكون فيه فرحان ،،
فرحان وانت بتفرح اللى قدامك ،، فرحان وانت شايفه بيضحك ،،
فرحان وانت بتقدمله جزء كبير من اللى معاك ،، مش بس فلوس ،،
بس حنية ومحبة واحتواء ،،
دوروا على الناس اللى بتعرف تدى بدون مقابل ،، على الناس الحنينه ،،
على الناس اللى تشوفوا فيهم اهلكم واخواتكم ،،
دوروا على الناس الحلوة ،، اللى بتعرف تدى حاجات حلوة ،، بكل الطرق الحلوة