منتدى الفرح المسيحى - تعالى نلم الخراف مانبعترهاش

https://upload.chjoy.com/uploads/1511776229841.jpg

كنت في الكنيسة وجه وقت التناول وكان قدامي شاب شعره طويل وملزقه بكريم جل
المهم ابونا رفض يناوله وقاله روح احلق شعرك وابقى تعالى
الولد اتحرج جدا وخرج
فكان فيه كاهن كبير في السن بيناول السيدات ، شافه وندهله وناوله
بعد القداس ابونا الكبير في السن اللي وافق يناوله بيقول لابونا اللي رفض
حاللني يا ابي .. بس ليه نحرمه من التناول
قاله لا يليق بأبناء الله يتقدموا للسر العظيم وهم في صورة لا تليق بالملك
فأبونا الكبير قاله
اولا ده شاب عامل عملية في راسه ومتخيط اكتر من ٣٠ غرزة ودايما مطول شعره وملزقه في بعضه علشان يداري اثر الخياطه
ثانيا يا ابي طالما مستعد داخليا للتناول وصايم ومقدم توبه ليه تبص للخارج والله ينظر الى الداخل !!
ثالثا لو لقيت حاجه لفتت انتباهك ماتحرموش من السر العظيم اللي جايز مايلحقش ياخده تاني ، ممكن بعد القداس تتكلم معاه وتلفت انتباهه لاي نقطة لاحظتها

تعالى نلم الخراف مانبعترهاش ، نحتضن ونشجع للتوبه وحياة الاستعداد
مش نمسك عصايا ونهوش بيها

السماء تفرح بخاطي واحد يتوب
حتى لو بنت ولبسها ملفت ،، الفت نظرها بعد القداس
ماتحرجهاش على الملئ ، لانها ممكن ماتجيش تاني
وتبقى اتسببت في عثرة عظيمه
الله يستر .. الله يحتوي .. الله يسامح ويغفر

#الصورة_رمزية