منتدى الفرح المسيحى - حاجات واحشانى / تادرس صلاح

الدايره الفاضيه المقفوله..

و التخته الأولى فـ سنه اولى..

و البنت اياها العسوله..

و الميس اياها المسطوله..

ناساية الواجب علطول..!

و الـ يوماتى..

كات بـ تقول..

ع البنور صباح الخير..!

و اِحنا نرد..

يجعل يومنا هنا و سرور..!

و وقتها حلمى انى ابقى كبير..!

و انى اطير..

و انى اشمعنا مانيش عصافير..!

و الرسم كمان ع السبوره..

بـ حروف الاِسم..

و عشق المانجه المعموله..

فـ العلبه عصير..!

و باشوره و فتافيت طباشير..

و الحصة بتاعة التعبير..

بتاع عيد الأم..!

و ايديا الساكنه كـ مكسوره..

فـ ايد الكم..!

و حفظ النص الـ علينا كان اكبر هم..!

و سلاحف النينجا الـ كات يومها..

مِ النشره اهم..!

حاجات بـ اتمنى ترجع تانى..

و لو حتى..

ساعات و ثوانى..

عشان اصلاً..

بقيت واحشانى..!

_*

_____________________________________
حاجات واحشانى / تادرس صلاح