منتدى الفرح المسيحى - مش كل اللي بيسامحوا ناس هبلة ...

https://a.top4top.net/p_685g6muk1.jpg

في فرق كبير بين التسامح و التجاوز ،
مبدأيا خلينا نكون متفقين ان مفيش اي حد يقدر يمسح الماضي او يغيير فيه إنما كل اللي نقدر نعمله هو تعديل رد فعلنا تجاه الماضي ،
مش حتي تأثير الماضي علينا لا ده كل اللي نقدر نيجي جنبه هو رد فعلنا بس !! ..

ففي التسامح انتا بتقرر تتغاضي عن رد فعلك بالكامل ،
لكن في التجاوز كل اللي انتا بتعمله انك يا بتأجله او تسيبه لظروف تانية بس لسه رد فعلك مدفون جواك و مستني الجو المناسب عشان يطلع !! ..
ففي الحالتين انتا مش بتنسي و لا تأثير الماضي بيختفي من حياتك لكن يا تختار تعدي عشان انتا من جواك سامحت ،
يا تعدي عشان بس الدنيا تمشي و تبقي تشوف الموضوع ده بعدين ..

المشكلة لما الناس تخلط بين التسامح و التجاوز و تتعامل مع رد فعلك مهما كان انه عفو شامل و تسامح تام ،
سواء عن جهل بحقيقة نيتك او عن عمد انهم يدفعوك جبرا علي التسامح بابتزاز مشاعرك او الضغط عليك حسب وضعك في الموقف ..
و ياما كتير بيحسوا انهم اتزنقوا في خانة "ميصحش" أو "في الاخر ملناش غير بعض" !
فيتجروا زي الفشلة لسلوك هما نفسهم بعد ما تهدي الاجواء يفضلوا يضربوا نفسهم عليه و يندموا ازاي خدوا قرار زي ده !!

فمهم جدا الشخص يكون واعي هو قرر يسامح و فعلا قلبه و فكره صافي ،،
و لا هو بس مش وقته و لا ظرفه فنبقي ناس كبيره و نعدي الموقف دلوقتي بس فيه واقفه و حساب واضح و ناضج بعدين ..
ففي النهاية ، مش كل اللي بيسامحوا ناس هبلة و لا كل اللي بيقرروا يوقفوا عن حاجة تضايقهم ناس نكديه او بتاعة حوارات ..
إنما العبرة بالقرار الواعي المناسب و التحمل المسؤول عن عواقب القرار ده ..