منتدى الفرح المسيحى - متسبوناش مرضى بمشاكلنا

https://upload.chjoy.com/uploads/1509797377541.jpg

جربت مليون طريقة ومفيش اي فايدة
لا بمعلقة نافع ولا بسرنجه نافع
لا بمحايلة نافع ولا بشخط نافع
لا بتحفيز نافع ولا بعقاب نافع
اقولها لو خدتيه هجبلك حاجه حلوة ، تقولي لأ
اقولها هاخدك ونخرج ، تقولي لأ
للاسف كانت رافضه كل الطرق
أسبوع كامل دوخة وراها ومفيش اي حلول
لكن علشان باقي عليها وبحبها مقولتلهاش في ستين داهيه
مقولتلهاش انتي حرة تاخديه ولا متاخدوهش ، اتفلقي
بعد تفكير طويل قدرت أعمل حيلة حلوة
اشتريت ازازة جديدة من اللي بيتركب فيها العطور
وغسلتها كويس جداً
وحطيت فيها مقدار الدوا اللي المفروض تاخده
وبخيته في بوقها
كانت فرحانه جداً بالطريقة ، لدرجة كانت بتقولي تاني
اوقات الواحد فينا بيحتاج للي يسايسه
بيحتاج للي يقدر زعله
يشوف ايه اللي رافضه ويتوفرله بدايل ليه
زهقنا من القمص والزعل وكلمة " اتفلق "
وكلمة في داهيه او انت حر
ابتكروا لينا طرق معاملة نحبها ، بلاش الجحود ومرحلة المش فارقه اللي وصلتولها
طبطبوا علينا وسايسونا ، وفهمونا براحه
طولوا بالكم علشان الحياة تمشي ،، وعلاقتنا متتقطعش
مفيش مبرر يخليكم تنهوا علاقتكم بحد مقتنعش بوجهة نظركم غير انكم مقدرتوش تقنعوه بيها ، مقدرتوش تحتوُّه ، مقدرتوش تفهموا دماغه
متسبوناش مرضى بمشاكلنا وتسبونا غرقانين فيها لمجرد اننا مقتنعناش بحلولكم
اصبروا علينا علشان تلاقوا اللي يصبر عليكم
حسسونا بقيمتنا وخاطرنا في قلوبكم لحد مانخف