منتدى الفرح المسيحى - فيه ناس لو راحت.. مابترجعش

https://b.top4top.net/p_651vpiuc1.jpg

احنا بنغلط كتير مع ناس حوالينا ..

قريبين مننا او بعاد و بنعاملهم بطريقة غلط..
بطريقة تخرج اوحش مافيهم ..
او بطريقة تخلينا نخسرهم خالص..

ربنا خلق البشر بشخصيات و انماط مختلفة..
الشخص اللي مصر يعامل كل الانماط بطريقته هو بس و شايف ان اللي بيحبه هيستحمل طريقته في المعامله يبقي عنده ذكاء اجتماعي منخفض جدا...
وده لأن مش كل الناس هينفع يتعاملوا معاه بحساسية مفرطة عشان هو شخص حساس..
ولا كل الناس هتستحمل صراحته المطلقة ولا طريقة التعبير عن رأيه عشان هو لما بيتعصب مابيعرفش بيقول ايه..
ماينفعش اتعامل باستهتار مع شخص منظم و مرتب و مواعيده دقيقه.. اكيد هخسره
ولا ينفع اتعامل مع شخص منطقي و عملي بالاحاسيس و المشاعر.. اكيد مش هيفهمني

لما تلاقي نفسك خسرتي ناس كتير حواليكي وتفسيرك للموضوع ان كل الناس بقت وحشة او مش حاسين بقيمتك.. او اتخدعت فيهم
لما تلاقي نفسك بتهرب من تجمعات الناس و مش بتستريح غير وانت لوحدك و تفسيرك للموضوع ان احنا مش زي بعض.. او طريقة تفكيرهم مختلفة او مش ذوق كفاية..
مش كل الناس علي نفس القدر من الذكاء الاجتماعي..
اهم حاجة عشان أكون صريح مع نفسي.. اني اعرف اقيم نفسي كويس..
و احاول اقرا الرسايل الخفية اللي في عيون الناس..

اسأل نفسي .. زوجي.. زوجتي.. اقرب اصحابي.. او حتي ابعدهم..
اقيم العلاقة مظبوط.. لو لاقيت نفسي بعاني من مشاكل في العلاقات اللي حواليا... وبزعل منهم كتير..او بزعلهم كتير..
ادور علي الحل.. في الكتب الكورسات.. محاضرات اليوتيوب.. مقالات و نصايح لناس متخصصة..
اهم حاجة ماسيبش نفسي اعاني من فشل العلاقات..
عشان اكيد في علاقات مابتتعوضش..
وفيه ناس لو راحت.. مابترجعش