منتدى الفرح المسيحى - الإحساس الأول .. هو الأصدق !

https://upload.chjoy.com/uploads/1504171682271.jpg

الإنطباعات_الأولى
الريحة اللي بتشمها اول ماتدخل المكان ..
الورقة المرمية و شوية التراب اللي عينك بتلمحهم اول ما تقعد في حتة ..
الصوت اللي بتسمعه اول ما صوت الدوشة المستمرة اللي حواليك يقف مرة واحدة ..
شعور الراحة او الإنقباض لما بتشوف حد لأول مرة .. او تدخل مكان جديد..

كل الحاجات و الأحاسيس اللي بنشوفها و نحسها في اول كام دقيقة .. هما دول الأصدق و الأصح ..
هما دول اللي تمشي وراهم و تصدقهم ..
قبل ما عنينا تتعود على المكان و تألف تفاصيله !..
و لا احاسيسنا تتشوش برغبات و ضغوطات من جوانا و من كل الحوالينا ..
بتقبل الوضع .. و انك مع الوقت هتتعود .. صحيح مع الوقت بنتعود ..
و الغريب بيبقى مألوف و عادي ..
و اللي مستصعبينه بيبقى اسهل و بيتحول تدريجي انه يبقى طبيعي و تلقائي ..

بس دة مش معناه ابدا ..
إن الريحة اللي شميناها في الأول خلصت و لا التراب نضف و لا الصوت وقف ..
و لا اللي حسيناه مش موجود .. إعتيادنا على الشيء لا ينفي وجوده او غيابه ..
هيفضل حتة مننا حساه و سامعاه و شايفاه ..
حتى لو تغافلنا او إتعودنا عليه.. او حتى كدبنا نفسنا و تعايشنا ..

و الصدمة بتحصل لما المؤثر بينتهي او بيضعف تأثيره او بيفتر ..
و ف لحظة بنقرر نفوق .. و نخرج من دوامة الإعتياد ..
او ييجي موقف او شخص في خطفة من الزمن .. يفوقك و يقولك بص و اسمع و حس ..

شوف الدنيا على نضافة و في النور زي ما كنت بتتمناها و متخيلها ...
ساعتها .. بترجع تفتكر إنطباعاتك الأولى .. و أحاسيسك الفطرية الحقيقية ..
بتبص وراك .. تلاقي وقت كتير عدى و خطوط متشبكة بينك و بين اللي فات ..
و مش دايما بينفع نرجع بالزمن لورا و لا نغير اللي جاي ..
كل اللي بتقدر عليه انك تقرر بعد كدة تصدق إحساسك ..
لإن دايما الإحساس الأول .. هو الأصدق !