منتدى الفرح المسيحى - هو ينفع جوزك .. يحبك اصلا ؟

https://upload.chjoy.com/uploads/150416843971.jpg

يعني ايه جوزك يحبك ؟ هو ينفع جوزك .. يحبك اصلا ؟
ما انتي مراته خلاص وام اولاده يحبك ازاي يعني ؟؟
وبعدين الراجل بيحب بالفعل مش الكلام .. يعني يحب عشرتك .. اكلك .. اهتمامك بيه وبولاده ..
طيبتك .. خفة دمك .. تفانيكي في خدمته ..يصرف عليكي كويس ..
ميستخسرش حاجة في ولاده .. لو عييتي بيوديكي لاحسن دكتور ..
حلو اوي الكلام ده .. بس هو بيحبك ؟؟

طيب هو بيخاف على زعلك ولا بيخاف من زعلك .. بمعنى أدق بيخاف من نكدك ؟
هو بيلبي طلباتك علشان يخلص من زنك ولا بيلبيها علشان حابب يلبيها ؟
بيخرج علشان يبقى خرجك ولا علشان عاوز يخرج معاكي ؟
بيفتكر مناسباتكم وبيحضر نفسه كده حيعمل ايه ويسوي ايه ولا بيجيب لك هدية غالية وخلاص علشان ميبقاش ليكي عين تعاتبي ؟؟ بيتكلم معاكي عن تفاصيل حياتك واصحابك وشغلك ومهما كنتي لكاكة بتحسي انه عاوز يسمع اكتر ؟ ابسطهالك ..
لما بتقولي له عاوزاك في موضوع بيقفل التليفزيون أو بيسيب التليفون أو الايباد اللي بيلعب عليه وينتبه لك ولا بيقولك اتكلمي انا سامع؟؟ ....
احنا الستات زرعوا في دماغنا على مر السنين كذبتين
اعتقد أن اللي بدعهم راجل :
الأولى : ( طبعا بحبك مش مراتي )
الثانية : ( الحب عندي أفعال انا مبعرفش اتكلم )

عزيزي الزوج :
انت بتضحك على نفسك ولا على مراتك ؟
على فكرة انت مش مطالب بالكذب ..
زي ما انت مش مطالب بالحب كفاية المودة والتعامل بالمعروف ..
بس كفاية تزييف حقائق .. كون انها مراتك مالهاش أي علاقة انك تحبها ..
تحب تفاصيلها .. صوتها .. ضحكتها .. تحب شكلها .. مشيتها ..
تحب حاجاتها البسيطة .. هدومها في دولابها.. دلعها الماسخ ..
يألمك زعلها .. يعصبك جفاها ... تموتك دموعها ...
احلى اوقاتك بتقضيه وهي حواليك ... بتحب تشوف أفلامها وتسمع أغانيها ...
بيوحشك صوتها بدون مناسبة .. تحن جوارحك ليها بدون مقدمات ...
تكسر روتينك علشانها قبل ما تراجع دفتر مواعيدك ..
تراضي خاطرها قبل ما تاخد رأي كبريائك ...
تشاركها في أهم قرارتك قبل ما تشاور اصحابك ...
تساعدها في المطبخ حتى لو خايف من زيارة امك ...
تحسسها انها الأولى والوحيدة والأخيرة ...
تملى حياتها واللي باقي من فراغها بعد خدمتك ...
وعلى فكرة .. كل اللي فات .. أفعال مش كلام وعمرها .. عمرها .. ما كانت كلام