منتدى الفرح المسيحى - حكاية القميص أبو 12000 جنيه المرتبط بالكرة الأرضية

حكاية القميص أبو 12000 جنيه المرتبط بالكرة الأرضية

https://www.christian-dogma.com/im0p...=260&q=50&.jpg

من منا لم ينتظر بفارغ الصبر بدء التخفيضات السنوية في المحال لشراء ما يلزمه في ظل حالة ارتفاع الأسعار التي تكتوي بنارها جيوب المواطنين، لكن في ظل ذلك تفاجئك صفحة مختصة ببيع الملابس على "الإنترنت" تعرض قميصًا بسعر خيالي.

لم ننس سعر سندوتش البرجر الشهير الذي وصل إلى 1500 جنيه، وتم الإعلان عنه منذ أيام عدة، وكان أثار ضجة كبيرة، لنجد أنفسنا اليوم أمام قميص رجالي بسعر خيالي "12 ألف جنيه" فقط.

المثير للدهشة أن الصفحة المختصة ببيع الملابس، تشير إلى أن السعر لفترة محدودة ما يعني أنه بعد أيام يمكن أن يتجاوز الـ20 ألف جنيه.

من المؤكد أن يكون انتابتك حالة من الشغف لمعرفة مواصفات القميص الغالي جدًا، فقد عددت الصفحة مميزاته الغريبة بعض الشيء، التي لم يسمع بها أحد من قبل.

قبل ما تسأل السعر دا ليه اعرف الأول عن القميص!
- عدد خطوط الكاروهات اللي في القميص هى عدد خطوط الطول والعرض نفسها اللي في الكرة الأرضية ودا بيديك طاقة إيجابية عالية جدًا
- اللون الأبيض اللي في القميص درجة لونه بتعمل على الراحة النفسية، والخطوط اللي بالرمادي بتنفذ قانون تضاد العناصر مع الخلفية
- غير أن القميص ده معالج حراريًا بألياف صناعية بتدفي جسمك في الشتاء، وتسقع جسمك في الصيف
- القميص مغسول أكتر من 46 مرة لعدم الانكماش أو التمدد
استمتعوا بمنتجنا الجديد بسعر "12 ألف جنيه" فقط، ولفترة محدودة جدًا

أشعل سعر القميص موقع التواصل الاجتماعي "فيسبوك"، فقد وصل عدد التعليقات على المنشور في أقل من 18 ساعة إلى أكثر من 16 ألف تعليق، و8000 مشاركة، و10 آلاف إعجاب.

قال نيمو: "بكام سيبها بظروفها يا حزن الحزن بيقولك خطوط طول ودوائر عرض"، وأضاف محمد أحمد: "ما تيجو نعمل جمعية وبعد ما نقبضها نستلف عليها ونكمل المبلغ ونشتري القميص ده".

وتابع عمرو زيدان: "القميص ده يا جماعة عالمي بجد، أنا جبته من شهرين وكنت أقرع دلوقتي طلعلي شعر"، وأضاف حوكة هشام: "طب مفهوش خاصية الطيران عشان بس مانعرقش كتير ونوصل أي مكان من غير ما نتأخر وبكده هانحل مشكلة المواصلات والناس بدل ما تجيب عربيات يجيبوا القميص ده، والا انتوا رأيكوا إيه".

وسخر أسامة صلاح، من سعر القميص، قائلًا: "طب لو قصيته بمقص أو نتشه مسمار هل كده خط الاستواء هيحصله خلل، يعني الفصول هتختلف في القميص، بلاش ده لو وقع كلور عليه كده القميص هيبقى في خرم وأوزن القميص هيدخلى أشعة الشمس الضارة، وبكده مناخ القميص باظ وبقى عندنا تلوث بيئي، يعني القميص بتاعكوا ميساويش جنيه ونص".

وقال عرفات ياسين: "إنت بتتكلم جد ولا بتشتغلنا، خطوط عرض ايه وطول ايه، وبعدين ايه قانون تضاد العناصر مع الخلفية، إنت فاشل في التسويق على فكرة".

وأضاف مودا حمزة: "في حاجة في sales اسمها اللعب على المجهول، زي مثلًا ايه قانون تضاد العناصر مع الخلفية، مين يعرفه، ولو عدد خطوط الكاروهات هى عدد خطوط الطول الطاقة برضه هاتيجي منين الاقناع معتمد على جهل العميل والزبون موش أكتر".