منتدى الفرح المسيحى - شد حيلك عاوزين نفرح بيكي

https://upload.chjoy.com/uploads/1503435480251.jpg

#شدي_حيلك_عاوزين_نفرح_بيكي
الجملة دي من الجمل القاتلة.. اللي بتوجع اي بنت نفسياً و ممكن تكسرها - بدون قصد - و خصوصاً لو تعدت سن الثلاثين.. لأن فيها شبهه اتهام غير مباشر ليها بالتقصير، و بيرمي جواها احساس بذنب هي ماعملتوش لمجرد انها مش متجوزة :(
بس السؤال هنا.. ايه اللي في ايديها انها تعمله، و هي مطلوب تتصرف ازاي في مجتمع بيكفل حق الأختيار للولد بس و ممكن يدي البنت في بعض الأوقات حق القبول او الرفض فقط!
و ايه الحل... هل ترمي نفسها في اي حضن لمجرد انها #تشد_حيلها؟
طبعاً لا لانه ازم نعرف ان اي علاقة صحية بتتبني علي القبول التام للطرفين و الا ها تبقي علاقة مُرهقة جداً !
حلو يبقي كده البنات مش ها تتجوز :/
بالعكس بس كل بنت عليها دور في الأختيار... و موضوعنا هنا عن ازاي ده يحصل :O
ببساطة فيه شوية حاجات محتاجة نفهمهم و نعملهم زي:
- في الاول لازم تعرفي ان الأرتباط مش هو اهم حاجة في الكوكب و ان نجاحك مهم جداً و هو اللي بيحدد شكل حياتك المستقبلية.
- خدي كورسات في مجالك و اسعي لتطوير شخصيتك، و ده ها يفتحلك مجال علاقات كتير و من نفس مستواكي :)
- ابعدي تماما عن الجمل السلبية زي #شدي_حيلك، #عاوزين_نفرح_بيكي، #اللي_قدك_معاهم_عيال و ما الي ذلك من الجمل اللي بتسبب احباط نفسي شديد لان مع تكرار الكلام ده ممكن جداً يسببلك نوع من القلق المرضي Anexiety من فكرة انك ممكن ما تتجوزيش :/ و اللي ممكن يبقي وسواس قهري (فكرة ملحة حاضرة دايماً) او نوع من الهوس بموضوع الجواز و ده ها يعطلك عن حياتك و علاقاتك و شغلك و يخلي اختياراتك مشوشة تماماً :(
- استقبلي الحب من الناس اللي بتقدمهولك بدون شروط و اسمحي لنفسك بالاستمتاع بيه زي الام و الاخوات و القرايب او الاصدقاء اللي بيقدمولك الحب بدون مقابل، لان ده ها يحسسك بالاشباع و بكده مش ها ترمي نفسك لأي حضن لانك جعانة للحب لكن ها يكون أختيارك واعي <3
- اهتمي بإنوثتك بالشكل اللي يرضيكي، اولاً لأنها هي الاهم و ثانياً علشان متعمليش حاجة لمجرد انهم عاوزين يشوفوكي كده... خليكي حقيقية 😍
- اسمحي لنفسك بتكوين علاقات صحية مع الاحتفاظ بمسافة آمنة علشان ما تتوجعيش و ده ها يخليكي تشوفي و تعرفي أكتر و يساعدك علي الأختيار بشكل أكثر عمقاً
- حددي اولوياتك في الحياة و اللي انتي عاوزاة لان ده ها يريحك بعدين
- ما تستنيش الفارس ابو حصان ابيض، لانه ببساطة مع الغلاء اللي عايشين فيه الدنيا بقيت صعبه، و حلو انك تتنازلي عن بعض الحاجات المبالغ فيها - اللي بتتعمل بس علشان نظرة المجتمع - في مقابل علاقة صحية مع شخص واعِ بشرط عدم التنازل عن حقوقك النفسية زي الطبطبة و الحضن و الاحتواء :*
- وسعي دواير علاقاتك (كنيسة - نادي - شغل - رحلات) لان ده ها يفتحلك دواير علاقات أكبر :D
و طبعاً فيه دور كبير من ناحية الأهل وهو :
- جواز بنتكم مش اهم حاجة في الكون و فخركم الحقيقي و سعادتكم في انها تكون مبسوطة <3
- ما تكسروهاش بإنانيتكم، علشان عاوزين تشوفوها في الكوشة لانه ببساطة ممكن تكون دي بداية السجن اللي ها يدمرها و يدمر احلامها :/
- ماتحققوش احلامكم في بناتكم و خلوهم يعيشوا بالشكل اللي هما عاوزينه
- سيبولهم حرية الأختيار
- هما اللي هايعيشوا... يبقي يعيشوا صح بدل ما يدفنوا نفسهم و مشاعرهم بقيه حياتهم
- انتم مش دايمين ليهم لكن علاقات الزواج اللي في حياتهم هي اللي باقية،.. خلوا الجملة دي دايماً قدامكم
#الارتباط_مش_اهم_ما_في_الكوكب
#أنوثتك_الحقيقية_تستحق_الاهتمام_أكثر