منتدى الفرح المسيحى

بقولك إيه ؟ .. ما تسيبي الشغل ده ! .. إنتي يعني غاوية بهدلة ؟ *
بس أنا خايفة أزهق يا حبيبي *
حد يزهق مع جوزه حبيبه ؟ .. طالما هيبقى عندنا وقت براحتنا هتبقى حياتنا كلها خروج و فسح *
...

خرجني *
مش فاضي *
خرجني *
أنا راجع من الشغل تعبان *
خرجني *
يا حبيبتي احنا في وسط الأسبوع .. هاخرجك يوم الجمعة ان شاء الله *

…
: يوم الجمعة

خرجني*
يا ستي يعني يوم الأجازة الوحيد اللي في الأسبوع مش من حقي أرتاح فيه كمان ؟ ؛ خروج إيه اللي بيتخرج يوم الجمعة ده كمان ؟

….

شوفت يا حبيبي المسلسل التركي ده ؟ فظيع .. هو و هي بيحبوا بعض و الظروف كلها ضدهم ..طول النهار و أنا بعيط جنبهم .. اللي حصل بقا يا سيدي ..
(يقاطعها)
تركي إيه و سوري إيه ؟ .. هو ده اللي انتي فالحة فيه أصلا .. القاعدة طول النهار قدام التليفزيون .. يا بنتي اخرجي شوفي الدنيا بره فيها إيه
ما انت مش بترضى تخرجني * !
ما تخرجي لوحدك هو انتي صغيرة ؟ *

….

رايحة فين ؟ *
خارجة *
لوحدك ؟ لاء طبعا .. إنتي ناسية إنك متجوزة راجل و لا إيه ؟ *
إنت مش قولتلي أخرج و أشوف الدنيا ؟ *
يا ستي أقصد معنويًا .. ممكن تخرجي و انتي في مكانك على فكرة *
إزاي يعني ؟!! *
إقري كتاب ! *
….

حبيبتي الأكل جاهز ؟*
لسه يا بيبي معلش أصل كنت باقرأ كتاب حلو *
كتاب إيه و زفت إيه ؟ .. ده استهتار .. يعني الكتاب أهم ولا حلة المحشي اللي ع النار ؟ *
!!! *

…..

مال شكلك زهقان كده ؟ *
من يوم ما بطلت قراية و فرجة ع التليفزيون مش لاقية حاجة أعملها *
ما تجربي تتصاحبي على حد من الجيران ؟ *

…

بقولك إيه ؟ .. أنا مش بحب موضوع الاختلاط بالجيران ده .. طالما كل شوية هتقعدي تقوليلي دي قالت و دي عملت .. مفيش دماغ للكلام ده .. متكلميش حد من الجيران تاني .. و يا حبذا لو تحافظي على هدوء البيت شوية .. بيجيلي صداع

…

حبيبتي أنا جيت *
… *
أنا جيت مش هتردي عليا ؟ *
...*
مش معقول كده على فكرة .. المفروض إني متجوز واحدة ست مش حيطة *

….

ع القهوة
زهقت منها يا وليد .. طول النهار قاعدة زي الصنم كده و مبتعملش حاجة *
يا عم هما الستات كلهم كده .. في الأول يبقوا لُطاف و بعد كده بيبقوا مملين ملل السنين .. أقولك .. إتجوز عليها*
لا يا أخي لاء ما يصحش *
… *
بس تصدق … فكرة برضو *
......
ل