منتدى الفرح المسيحى

https://files.arabchurch.com/upload/i...6956226062.jpg

عمرك فكرت إنت ليه بتعمل خير وبتدي الناس الغلابى!!

عمل الخير حاجة مهمة جداً كلنا بنشجع بعض عليها، لما بتعمل حاجة كويسة لحد بتكون مبسوط ومرتاح، وفيه ناس كتير لما بتحس إن ربنا مديها بتحب تدي الناس التانية علشان ربنا يبارك لها في اللي بتعمله وطبعًا عمل الخير مش بيقتصر على حاجة معينة تعملها، يعني مش لازم تعمل عمل كبير أو تدفع مبلغ كبير علشان يبقى اسمك فاعل خير، لكن ممكن تعدي واحد في الشارع مثلًا وتبقى فاعل خير علشان الله مش بيحسبها بالحجم.

المهم عند الله مش حجم الخير اللي بتعمله المهم إتجاه قلبك وأنت بتعمل خير، يعني تكون عايز تساعد فعلاً مش تظهر للناس قد إيه أنت كويس وبتساعد الناس، وتفتخر بحجم وكمية المساعدات اللي قدمتهالهم، صدقني الحجم ميفرقش مع ربنا خالص لكن القلب اللي عايز يساعد، زي المرأة اللي أعطت فلسين من إحتياجها بالرغم من إنهم قليلين لكن المسيح مدحها لأن كان إتجاه قلبها عطاء مش فخر.

ماتحسبهاش!

من الحاجات المهمة أوي كمان في فعل الخير اللي المسيح قال عليها “وَأَمَّا أَنْتَ فَمَتَى صَنَعْتَ صَدَقَةً فَلَا تُعَرِّفْ شِمَالَكَ مَا تَفْعَلُ يَمِينُكَ، لِكَيْ تَكُونَ صَدَقَتُكَ فِي ٱلْخَفَاءِ. فَأَبُوكَ ٱلَّذِي يَرَى فِي ٱلْخَفَاءِ هُوَ يُجَازِيكَ عَلَانِيَةً.”(مَتَّى ٦: ٣_٤) يعني مش لازم الناس تعرف وأفتخر وأجيب كاميرات وأتصور وأنا بعمل خير وأنشرها على السوشيال ميديا، كمان مهم أوي وأنا بعمل خير محسبهاش، يعني مقولش ده صعب عليا ومش هقدر، صدقني الله اللي حط في قلبك الخير هيساعدك علشان كده قال وأنت بتعمل خير متستخسرش “أَعْطُوا تُعْطَوْا، كَيْلًا جَيِّدًا مُلَبَّدًا مَهْزُوزًا فَائِضًا يُعْطُونَ فِي أَحْضَانِكُمْ. لِأَنَّهُ بِنَفْسِ ٱلْكَيْلِ ٱلَّذِي بِهِ تَكِيلُونَ يُكَالُ لَكُمْ».(لُوقَا ٦: ٣٨) أفتكر دايمًا أن فعل الخير مهم لكن الأهم طريقة فعله.