منتدى الفرح المسيحى - فرق كبير بين حد بيحبّك بجد ..وحد بيمثّل عليك الحُب ..

فرق كبير بين حد بيحبّك بجد ..
وحد بيمثّل عليك الحُب ..

بالنسبة للى بيحبّك :
1_ عارف كويس جداً إنه لو خِسرك مش هيعرف يعوّضك .. فَـ مابيحاولش يعمل ده ..
2_ واثق إنه لو كرر نفس أخطائه معاك هيقلّ من نظر قلبك ..فَـ بيبذل أقصى جهده إنه ما يكررهاش ..
3_لو بيخدع الدنيا كلّها ..بيجي لحد عندك و يفرمل ...
4_ما بيعرفش يتفلسف قُدّامك ولا يحللّ مواقفك ؛هو قابلك زي ما انت ده كمان بيعيش عشان يرضيك بكل الُطرق ..
5_بيفهم فيك حاجات انت ذات نفسك ما بتفهمهاش ولا بتشوفها ...بمعني أصحّ بيتلفت لتفاصيل التفاصيل اللي ماتجيش على بال حد ..
6_حاسس بيك بمعنى الكلمة ؛في الشِدّة "سند "وفي الوِحدة "ونيس" و في الغربة " وطن " ..
7_محبّته مش مُجرّد كلام معسول ؛محبّته أفعال أكتر من الكلام ؛ يخاف لو قصّر قي حقّك يقلّ رصيد إهتمامك وحُبك ليه ..فبيحاول بأقصى ما عنده يقوم بكلّ واجباته تجاهك ..من غير ما انت تطلب ده ..
8_غير مجهد نفسيا أو عصبيا ...غير مهلك ذهنيا ... بيعرف يجدد فيك الحياة مابيقتلهاش ..بيعرف يبني فيك ..ما بيهدمش ...
9_ بيجتهد في الحِفاظ عليك ؛ لأنّه مؤمن إن الحُب مجهود مش مُجرّد تصرّفات بتجمعكم ؛ الإرتباط بالنسبة له " مُقدّس "بيعرف يتوّحد فيك إزاي ...

اللي بيمثل إنه بيحبك ..
1_مش محتاج يبذل أي مجهود في علاقته بيك لأنّه عارف إنه وجوده معاك مؤقت ...فبيداري خيبته بالنفاق طول الوقت ...." نفاق الإهتمام " ....اللي هو عامل نفسه بيهتم وتبقى معاه طول الوقت بعقلك و قلبك وهو مُجرد " مُتلقّي " و لما تحتاج له بيكون أبعد الناس عنك ....
2_ما بيحسشّ باللي بيوجعك إلا في حالة لو شكيت له تعبك ...غير كده فهو أصمّ وأبكم ...مش انعدام شعور على قد ما هو " تبلّد عاطفي " لأنه مش بيحمل لك أي عاطفة حقيقية ..
3_مش شغلاه تفاصيلك لأن من الأساس هو بيجهل إهتماماتك و أهوائك و ميولك .. ما عندوش استعداد يجهد نفسه ويعرفها ؛ لأنّه ببساطة بايع القضيّة و شايفك " لُقطة " حد كيوت بيعرف يحب ويتحب ...الوقت معاك لذيذ مش أكتر "...
4_فاشل جداً في أي إختبارات للحُب ؛مُزيّف ؛مُتصنّع ؛ مُراوغ ؛ أناني من الدرجة الأولى ...
يعني الموضوع بسيط : ميّز بين اللى بيحبّك فعلاً و اللى مستعد يقضّي عمره كله في إنتظارك ...وبين اللّي مش فارق معاه غيابك من حضورك ..
في كتير بيعرف يحبّ و كتير بيعرف يعيّشك لحظات حلوة ...بس مؤقتة .
لكن مش كتير اللي بيعرف يكون مسئول قُدام الحب ..ولا جدير بكده ولا يستحق حتى يسمع منّك كلمة " بحبك"...
" نصيحة : غللي نفسك...ما ترخصهاش .... انت مش حقل تجارب"
هدى سالم