منتدى الفرح المسيحى - اتجوزت ياعيني

https://upload.chjoy.com/uploads/1501574414361.jpg

اتجوزت ياعيني
قصدي ألف مبروووووك
بهزر يا رمضان .. ما تاخدش الكلام ع صدرك كدا
هقولك كلمتين يا حبيب اخوك حطهم حلقة في ودنك عشان تعرف تتعامل مع المودام من غير ما تتجنن لا قدر الله
بنحاول نطول عمرك الافتراضي اطول فترة ممكنة
الست عايزاك تهتم بيها وتكلمها وتسمعها وتشاركها في ادق تفاصيل يومك
اتصال نص دقيقة .. رسالة قصيرة تطمن عليها منك ممكن يخليها تحبك وتعشقك
وانشغال عنها مع الوقت هيولد جفاء و هتكرهك
اه والله النقيض وش كدا
.

الست يا سيد الناس لو زعلت عايزة تحس ان زعلها غالي عليك فلو سيبتها تهدي ولا مشيت ولا تقلت عليها تاكد انك كدا عامل زي اللي نسي القهوة ☕ عالنار هتفور في وشك ولا هتهدي ولا بتاع
الحل طيب خاطرها وطبطب عليها وخدها في حضنك وقولها كلام حلو من قلبك وهي هتهدي وهتبقي زي الفل☺
.

الست يا ريس مهما بانت انها حريصة ع فلوسك ومش عايزة تكلفك او حتي مليونيرة ومعاها اللي يكفيها لاخر العمر بيبقي نفسها تجيبلها انت من نفسك اي حاجة
وبالمناسبة اي حاجة منك هتبقي كبيرة اوي الفكرة مش الفلوس الموضوع معناه انك مقدرها ونفسك تفرحها
.

الست يا بيه حساسة جداااااا جداااا للكذب والتصنع عندهم قرون استشعار يا ابني
فانت ماتحاولش تكذب او تتصنع اعترف بمزاجك احسن ماتعترف غصب عنك
.

الست يا ريس عايزة تقدير ليها كلام حب طول الوقت لهفة شكر ومدح ومشاعر واهتمام الحاجات دي مابتقدمش عندهن ولا موضتها بتبطل ولا تاثيرها بيقل الحاجات دي بتقلبها بيت ايديك ملبن وانت تشكله
.

الستات يا غالي عندهم حول في مشاعرهم يعني لما تقولك ابعد عايزاك تقرب
لما تقولك انها ماعدتش بتحبك تبقي بتموت فيك بس واخدة ع خاطرها
لما ماتردش عليك او تاخد جنب بتبقي عايزاك تحاول معاها
هي عايزة تتاكد انك متمسك بيها ومش بالساهل كدا هتزهق وتبعد عنها
والا تبقي كدا دي الخطيئة التي لا تغتفر عندها
من الاخر ماتأخدش ع كلامها اوي وقرب منها وهي هتحبك اكتر
.

بص يا ابني الستات كائنات طيبة ومش معقدة هم كدا من يوم ماخلقهم ربهم فطرة مفطورين عليها
هم بس محتاجين اللي يفهمهم ويحبهم ويعرف يهتم بيهم بجد وهيعيش ساعتها ملك زمانه