منتدى الفرح المسيحى - اللقا مش سلام إيد.....

https://upload.chjoy.com/uploads/1498726729781.jpg

حاجات زي نبرة صوتك في السلام،
زي لهفتك في اللقا، زي عفويتك في المحبة،
زي ابتسامة عينيك، زي خطوة قرب في بعاد سببه عناد،

حاجات جوا منشن عملته لحد في بوست فيه كلمة شكرًا،
أو منشن قولت به لصاحبك بعد سنين فاتت فاكر يا صاحبي؟ كانت أيام جميلة،
زي أنك تقول عندي ليك كتير يشفع وتقدر تسامح،
زي أنك تحب بدون مقابل. بدون سبب. بدون انتظار لنتيجة،

زي أنك تحب وبس. زي مودة مستكبرتش تظهرها، أو ابتسامة محسبتهاش ضعف،
زي دمعة في حضن وداع قدام مطار، أو نظرة أخيرة قبل ختم مغادرة،
زي بكا الفراق اللي كان بقوة المحبة،
زي انك ترجع تتصل بحد علشان بس تقوله مهنش عليا زعلك آسف،

حاجات كتير كانت بسيطة في عينيك وكبيرة في قلوبهم،
كان سهل أنك تقولها وصعب أنهم ينسوها،
حاجات قربت بها خطوة فقربوا لك بها خطوات،
حاجات محت جواهم أحزان أو زادت جواك سعادة،
حاجات عرفوا بها أنك رغم الغياب فاكر،
وإن الغياب عمره ما كان غياب جسد. غياب روح،
وإن اللقا مش سلام إيد. سلام قلوب مطمنه في وجودك.
سلام يسد في قلوبهم كل ثغرات الألم، ويفتح في روحهم كل أبواب الأمل.