منتدى الفرح المسيحى - اصنع تكييفك بنفسك تعرف على الخطوات

اصنع تكييفك بنفسك تعرف على الخطوات

https://www.christian-dogma.com/im0ph...=260&q=50&.jpg

زجاجة بلاستيكية بداخلها قطع ثلج مثبتة على مروحة مكتب برباط سميك، أدوات بسيطة لجأ إليها المصريون كطريقة غير مكلفة لتحدى الحر فى ظل ارتفاع أسعار أجهزة التكييف. «المبرد اليدوى» هو الطريقة التى انتشرت على مواقع التواصل الاجتماعى ومنها إلى البيوت الحارة لجلب هواء بارد يلطف من حرارة الطقس.
حب الشاب العشرينى محمود هشام للتجربة هو ما دفعه لتنفيذها فى غرفته خصوصاً فى ظل موجة الارتفاع الرهيب فى درجات الحرارة: «شفت الفكرة على (فيس بوك) ولقيتها سهلة جداً فحبيت إنى أجربها، جربتها فى المروحة بتاعتى فى الأوضة ولقيتها بتغير الجو فعلاً وتخليه بارد إلى حد ما». عدم وجود غطاء على موتور مروحة «محمود» كان الصعوبة الوحيدة التى واجهته فى البداية لكنه تغلب عليها بعزل الماء عن الموتور بالورق المقوى العازل: «المروحة بتاعتى كانت قديمة شوية والغطاء بتاع الموتور كان ضايع لكن أنا اتصرفت وحاولت أعزل الثلج عن الموتور عن طريق الورق المقوى».
الحال نفسه لدى نبيل ياسر الذى نشر تجربته على موقع «فيس بوك» حتى يستفيد منها الآخرون، وذلك بعد نجاحه فى تنفيذها: «التجربة دى هتنفع الناس اللى معندهاش قدرة إنها تجيب تكييف، هما زجاجتين بيبسى أو حاجة ساقعة والمهمة هتم بنجاح».
وبحسب «نبيل» فإنه لا بد من قطع قاع الزجاجة حتى يتم خلق فتحة لإدخال الثلج منها بعد ذوبانه، كما أنه لا بد من التأكد أن الزجاجتين مثبتتان فى المروحة بشكل قوى: «ممكن الزجاجتين تتثبت فى المروحة عن طريق سلك قوى يتلف فى إطار المروحة، ولازم نتأكد إن الميه اللى هتسيح بعيدة عن الكهرباء نهائى».