زوادة اليوم: المحاكمة
ارتكب راهب غلط كتير كبير، وقرّرو إخوة الدير، يبعتو ورا ناسك حكيم حتّى يحاكمو، بسّ هالناسك ما كان حابب ينفّذ المهمة، بس بعد إصرار الإخوة، وافق.
وقبل ما يروح ع الدير أخد معو سطل عبّاه رمل وعملّو ثقوب كتيرة بكعبو، ولماّ شاف ريّس الدير شو عمل الشيخ الناسك، سألو شو الغاية من هالعمل، جاوب الناسك: «بكل بساطة أنا جايي تحاكم خيّ من إخوتي، بالوقت يلّي خطاياي عم تنسكب ورايي متل هالرملات، بسّ الظاهر ما بتطلّع ورايي، من هيك ما بشوف الرمل وما بعرف إنّي خاطي، وبفكّر عندي القدرة والجرأة حتّى دِين غيري». ساعتها قرّر الرهبان يلغو المحاكمة.
الزوّادة بتذكّرني وبتذكرك بكلام الرب يسوع:
«قبل ما تشيل القشّة من عين خيّك شيل جزع الشجرة من عينك».