منتدى الفرح المسيحى - حب على الورق

https://upload.chjoy.com/uploads/1498852029571.jpg

كلمته بصوت خايف ومهزوز وقالتله ..
ممكن تسمعني من غير ما تتعصب عليا
ممكن تديني الامان عشان اعرف افتحلك قلبي واتكلم
ممكن تسمعني ف مرة للاخر من غير ما تقلب الترابيزة عليا وكأننا دخلين حرب ولازم تنتصر فيها
ممكن تكون عادل وحقاني وتشوف الحقيقه كامله
ممكن ؟!)
رد عليها وهو متفاجئ من كلامها وقالها اتكلمي

قالتله انت حبيتني ع الورق لكن منفذتش
بصلها بغضب وقلها يعني ايه
قالتله يعني عملت زي المهندس اللي رسم بيت حلو اوي وكل يوم يحط تعديلات عشان يكون البيت احلي بس ف الاخر بيلف الرسمة ويحطها ف الدرج
قالها مش فاهمك وضحي عايزة تقولي ايه
قالتله ايه الفايدة انك دايما تقولي بخاف عليكي بس مبتحمنيش وبتسيبني اواجه مشاكلي لواحدي
ايه الفايدة انك دايما تقولي بحبك و انت مش عارف تحسسني بحبك
ايه الفايدة انك تكون دايما قريب مني بس مش فاهمني
ايه الفايدة انك دايما تفتقد وجودي وتشتاقلي وانت اللي بتهملني
ايه الفايدة اني اكون من ضمن روتين حياتك بس مش من أولوياتك
انت معرفتش تحبني صدقني للاسف دي الحقيقه
انت رسمت شكل لحبك ليا بس معرفتش تنفذه
فشلت انك تفهمني ،وفشلت انك تحتويني، وفشلت انك تكون سندي ، وفشلت انك حتي تديني الامان
فشلت ف كل حاجه وعدتني بيها بس نجحت ف انك تخسرني

قالها واكتشفتي كل ده امتي
قالتله كنت كل شويه بكتشف حاجه وحاولت افهمك واكلمك بس انت مبتسمعش غير صوت نفسك
قالها واشمعني اتكلمتي دلوقتي
قالتله لان كل محاولاتي معاك فشلت فكان لازم اتكلم و عارفة انك هتهاجمني بعد كلامي ده بس كان لازم اقوله عشان انا عايزة اكسب نفسي
قالها بكل هدوء متخافيش مش ههاجمك .. ومدام شايفه كدا تقدري تسبيني مدام تاعبك
ردت وهي مبتسمه وباين عليه خيبة الأمل وقالتله كنت متوقعه ردك ..
قالها اشمعنا ..
قالتله نسيت اقولك اني غاليه اوي ف حياتك ومتقدرش تستغني عني بس ع الورق انما الحقيقه اني كنت روتين بايخ ف حياتك كان لازم تبطله ...... ف حاضر هبعد عنك بعد اذنك ....
اسفه اني شغلت وقتك ..