منتدى الفرح المسيحى - مش عارفة ليه الجواز صعب والناس مبتتجوزش ؟

https://upload.chjoy.com/uploads/1498844078731.jpg

مواصفات العروسة المثالية في مصر :

طويلة بس أقصر منه ،
رفيعة بس كيرڤي ، وكيرڤي بس مش تخينة ؛
شعرها أصفر وناعم وطويل بس قصير شوية وبني وكيرلي ؛
عينيها واسعة بس مش بني عادي ، لازم تبقى خضراء أو زرقاء وممكن عسلي بس بتخفيض في المهر ؛
طبعاً لازم تبقى بنت ناس جداً وغنية ومتدلعة وهانم ، بس تقبل تعيش معاه على قد الحال ؛
وتكون متدينة ، بس صاروخ وقنبلة وهيفاء وأنجيلينا وسكارليت في بعض ؛
تكون خجولة ورقيقة وضعيفة ومبتعرفش تعمل حاجة من غيره ، بس في نفس الوقت مستقلة وغفير وقوية ومعتمدة على نفسها علشان متقرفوش .

ولازم سنها يبقى مناسب طبعاً لا نفس سنه ولا أكبر منه علشان ماتبقاش عجوزة أصل الستات بتعجز بدري ،
ولا أصغر منه علشان متبقاش عيلة أصل البنات دماغها فاضية ؛
وياريت تكون بتشتغل وبتجيب فلوس ، بشرط تحسسه إنه راجل البيت وهو اللي بيصرف ؛
وتكون مثقفة ومطلعة وبتقرأ وعقلها مشغول بحاجات أهم من شغل البيت ومشاكل الشغالة ،
بس في نفس الوقت متفرغة لشغل البيت والعيال والطبيخ والشغالة ؛

عايزها تخلف نص دستة بشرط تفضل مانيكان روسية بترقص باليه بحيرة البجع كل يوم الصبح عالريق ؛
تكون بتعرف تطبخ وترقص وتسوق وتغني وتنضف البيت وترسم وتلمع وتعزف بيانو وتكوي وتربي عيال وكمان تدلع الزوج طبعاً .
تكون بتحب تخدم أهله ، بس تبعد عن أهلها علشان مش عايز وجع دماغ من القرايب ؛

وياريت تكون اجتماعية ومتكلمة علشان تشرفه في وسط معارفه ،
بس من غير ما تظهر قوي وتغطي عليه وتحرجه ؛
وياريت يبقى ملهاش أصحاب إلا هو علشان هو كفاية عليها ،
وفي نفس الوقت شاغلة نفسها عنه علشان مبيحبش الزن والخنقة ؛
لازم طبعاً تكون بتعرف تلبس شيك جداً بحيث الناس يغمى عليهم أول ما يشوفوها ،
بس ضروري لبسها يكون مش ملفت علشان محدش يعاكسها ؛

وتكون مدبرة ومبتصرفش كتير على الشوبنج علشان الحاجة غالية ،
بس دايما تفاجئه بحاجات جديدة علشان مبيحبش الملل والروتين .
مهم تكون بتحب البلايستيشن والكورة واهتمامات الرجالة علشان تشاركه فيها ،
بس في نفس الوقت أنثى ودلوعة ومش راجل يعني ،
وكمان مبتعرفش تفكر زي الرجالة علشان متقفشوش لما يحب يلعب بديله ؛

مهم كمان تكون بتحب اهتمامات الستات وبمبي وباربي ،
بس في نفس الوقت متكلموش عن اهتماماتها ولا تاخد رأيه فيها ولا تطلب منه يشاركها علشان هو مش ست يعني ؛
ولازم تعمل له كل اللي كانت الوالدة بتعملهوله ، بس متعاملوش كإنه عيل صغير كإنها أمه ؛
بتاكل بالشوكة والسكينة وتقفل بقها وهي بتاكل وتتصرف شيك زي البرنسيسة ،
بس تبتسم لما هو يلغوص في الحلة عادي ؛
وتكون شيف خمس نجوم وهوايتها المحشي والفشة والكرشة ،
بس مبتقفش كتير في المطبخ ولا تبقى ريحتها بصل أو زفارة في أي لحظة في اليوم ؛
وأساسي طبعاً تلبس هوت شورت وتحط مكياچ وهي بتطبخ كل يوم زي الأفلام الأمريكاني ،
أومال هو الجواز عملوه ليه ؟!

مش عارفة ليه الجواز صعب والناس مبتتجوزش ؟