منتدى الفرح المسيحى - كن لطيفا عشان حرفيا محدش ناقصك.

https://files.arabchurch.com/upload/i...8250352097.jpg

الذوق يا جماعة الله يباركلكوا.
..
- لما تخبط في حد إتأسف بلاش شغل التريلات ده.

- لما حد يخبطك بقى وييجي يتأسف متبصلوش بقرف كإنه رجع عليك. عادي قول مفيش مشكلة من غير بصات مريبة.

- إيه المشكلة لما تقابل الناس بإبتسامة. كلنا مهمومين ومينفعش نطلع قرفنا على بعض.

- لما حد يعملك خدمة قول شكرا.

- إطلبوا الحاجة بأدب وذوق بلاش أسلوب الأمر ده.

- هل لازم أقلل ال brightness خالص عشان أطمن إن محدش باصص في موبيلي وأنا بكلم حد أو بعمل أي حاجة عليه؟

- هيحصل إيه لما تغلط في حد وتعتذر؟ المكابرة ليه؟

- لما حد يتعب عشان خاطرك في حاجة قدر ده وحسسه إن فعلا مجهوده فرق. شغل التناحة بتاع "إنت عملت إيه أصلا" ده وحش أوي أوي أوي.

- إنت كراجل مش مجبر تقوملي نهائي في المترو مثلا. بس مجبر تقوم للست الحامل والناس الكبيرة أو المريضة.

- والله لو مقاملكيش من على الكرسي ده مبينقصش من رجولته. مش المفروض ترتاحي ويموت هو وتفضلي مستحقراه الطريق كله. يمكن هو تعبان أو مش واخد باله أو بيمارس حقه الطبيعي في إنه ركب قبليكي المترو فقعد.

- ال waiters مش خدامين عندكوا. دي ناس بتشتغل في مكان وبيقفوا بالساعات عكس أنتختكوا على الكرسي. إحترموهم وعاملوهم كويس.

- قول رأيك بأدب ومتحكمش على حد من facebook او من اي علاقة سطحية بينكوا.

- لما تلاقي حد عامل حاجة كويسة أو لابس لبس شيك قوله ده. بلاش إنتقاد الناس الدائم.

- بلاش سف وتريقة على خلق الله والنمر اللي مبتخلصش على اللي نعرفهم واللي منعرفهمش. دي حاجة مؤذية نفسيا جدا.
..
من الآخر .. كن لطيفا عشان حرفيا محدش ناقصك