منتدى الفرح المسيحى - من غير شكراً

https://upload.chjoy.com/uploads/1498566164631.jpg

هتحس بإيه لو عملت حاجة كويسة لحد وفــ الأخر مافيش حتى كلمة شكر اتقالت لك؟

مرات كتير ناس بتسألني على محل أو شارع وبعد ما اقولهم يلفوا ويمشوا، أوقات كنت بحس ازاي الناس دول بيعملوا كده أقل حاجة يقولوا شكرا، أوقات تاني كنت بخدها بطريقة كوميدية وأقول بصوت عالي العفو انتوا تأمروا،يمكن أوقات بنتعود مثلًا أن ماما بتحط الأكل فعادي مش لازم كل مرة أقولها شكراً على تعبك،أو بابا وهو جاي بيجبلي اللي محتاجة فطبيعي يعني مش هقول شكراً، عمرنا ما فكرنا لو ماما يوم رفضت تعملنا أكل هنحس بأيه،أو لو بابا رفض يجبلنا اللي محتاجينه أكيد هنضايق.

وأنا بفكر اد ايه الموضوع ده مش لطيف جيه في دماغي الــ١٠ البرص اللي المسيح شفاهم ومفيش غير واحد بس رجع قاله شكراً… ياااه ازاي عملوا كده؟؟ ده انتوا كنتوا منبوذين ومحدش بيكلمكم وهو رد اعتباركم ازاي مشكرتهوش؟؟، مش الـــ ٩ـ البرص بس اللي مشكروش، أنا كتير مش بشكره لأني كتير بتعود على إحسانات الله ليا زي ما بتعود على الأكل من ماما والطلبات من بابا ومش بفكر لو صحيت الصبح ملقتش الأحسانات دي هحس بأيه،كتير بنسب نجاحي لنفسي وبنسى وقفت ربنا معايا،كتير بطلب حاجات وخير وانسى أشكر صاحب الخير، كتير بشوف النفس الداخل والخارج ده حق مكتسب، وصحتي ده أمر طبيعي، شغلي ده مجهود شخصي مني، وبيتي واستقراري ده حاجة طبيعية جدااااااااا، والأصعب من كده اني اوقات بفتخر بالحاجات دي وكأني صاحب الفضل فيها.

الشكر واجب

ارفع قلبك واشكر ربك على الحاجات اللي متعود عليها على النفس اللي طالع منك،على العيلة اللي أنت في وسطيها، على الأكل اللي بتاكله،على الموبايل والكمبيوتر،على نجاحك،على شغلك،على صحتك،على شفائك، لو فضلت عمرك كله تشكر مش هيكفي صدقني علشان كده أوعى تنسى تشكر، واوعى تشوف أن أي حاجة عندك فضل منك أو شطارة منك أنت صحيح عليك دور بس الفضل كله لربنا فبلاش تنطط بحاجة عندك على حد،لكن أشكر ربك ودايمًا افتكر أن هو الرب اللي عمل كده وبدونه مكنش هيبقى عندك أي حاجة من اللي بتفتخر بيها.