منتدى الفرح المسيحى

بعض الناس .. بيعرف يخبي مشاعره اوي .. بيعرف يمثل أوي .. ممكن يكون موجوع .. ممكن يكون بيتألم .. وبيضحك في وشك ولا كأن جواه مشكلة ..
الناس دي اتعلمت عشان تعيش .. ان مفيش حد حيفهم مشاعرها .. وكل ما تحس أن حد حيبدأ يفك لغزها ويفهمها .. تقلب شعورها لشعور عكسي عشان متتفهمش .. كل ما بتعيش مستخبية جوا مشاعرها كل ما بتحس بأمان .. كل ما تقرب أوي وتكتشف اللي جواها .. تروح بانية حيطة عالية أحسن لما تفهمها .. توجعها بالرفض .. او تخاف من عُمقها فتهرب وتبعد ..
المشكلة أنهم لا وعياً بيلعبوا لعبة الإختباء للشعور بالشكل ده .. وبشكل اندفاعي كبير .. ممكن ميميزوش الrollercoaster اللي بيرٙكِبوه للي بيتعامل معاهم .. بيقلقوه .. ويحسسوه لحظة انه جوا قلبهم فيرفعوه سابع سما.. واللقطة التانية يهبدوه في الأرض وكأنه ولا حاجة بالنسبة لهم ..
لو حسوا بتهديد .. ممكن لقطة يعيطوا او يظهروا مشاعرهم الحقيقية .. وده معناه كبير .. انهم بيدخلوك في دايرتهم القريبة و بيوروك اللي جواهم .. بس لو لقوا منك عدم تقدير .. عدم تفهم .. رفض لشعورهم .. تسفيه او تريقة .. اى نوع من انواع تهديد لذاتهم .. او حتى حسوا ان المشاعر مش متبادلة هووب تلاقي الماسك اترسم .. لدرجة البرجلة .. اللي هو انا بقيت كويسة وعيشة فل ولا الدموع .. احسن تفتكر اني بحبك ولا حاجة ..
علامة انك بتتعامل مع شخص بيخبي عواطفه .. البرجلة ديه في استقبال تصرفاته .. القريب البعيد .. اللي بيحبك اللي مش مهتم .. يوصلك انك تتجنن .. انا بكلم مين دلوقت؟
طبعاً في ناس تقولك عليا بإيه من الجنان ده .. ساعتها حياخدوا نفسهم ويمشوا ..
ويبقى الحيلة الدفاعية لتغطية شعوره عشان يحمي نفسه وعلاقاته هى نفسها اللي بتخليهم يمشوا .. وبرضو هو مش بيكون مستوعب انه بيأدي بسلوكه للي بيخاف منه بالظبط .. بيتوجع اكتر .. فبيلبس الماسك بشكل اقوى المرة الي بعدها .. كل خيبة .. كل فقد .. كل خذلان بيكبر تخبيته لمشاعره اكتر ..
لغاية ما هو نفسه يتوه جواه .. تبدأ مشاعره تلاعب اللي قدامه بدون وعى .. لو حس بتهديد وعدم امان ممكن يتوهك متعرفش راسك من رجلك معاه .. وهو نفسه يتلغبط من حاله .. ويحصل له تربنة مشاعر .. اللي هو انا مش عارفني .. انا تهت مني!
الناس الي حتحبه زى ما هو .. حتشوف ورا طلعاته ونزلاته .. حتفهم ان برجلته مش بتمثل هما ايه ليه .. قد ما بتمثل خوف وقلق منه تجاه مشاعره ليهم ..
فلو بيحبوه فعلا .. حيهتموا يحققوا له الأمان .. الوضوح .. التطمين .. التواصل وتأكيد المكانة ..وعدم ترك مساحات كبيرة للتأويل .. او التفكير والظنون .. عشان يفضل مطمن هو ايه بالنسبة لهم ..
وفي نفس الوقت يحرصوا بشكل كبير انه وقت ما يعبر عن نفسه يحصل من طرفهم قبول تام لحكيه .. بكل العك اللي بيتقال .. مهم اوي يحس بالقبول ويطمن ان مكانته متغيرتش في قلبك لما حكى معاك اللي مضايقه .. لان اضطراب مشاعره ليها علاقة برؤيته لنفسه .. واحساسه ان لو حد عرف شعوره او افكاره هيرفضوه وينفروا منه ..فلما تديه قبول حيبدأ ينفتح لك .. ويحكيلك .. اسمعه للاخر ..ولو حتدي نصيحة .. اكد مكانته جواك الاول ..وادي نصيحة وانت بطمنه انك مهتم .. مش بتهاجمه ..
لو انت الشخص اللي بيحس باحتياج لاخفاء مشاعره .. ده بيكون تكوين شخصيتك من الصغر .. فجزء كبير منه في اللا وعى .. وممكن تكون مش مستوعب انك بتمارس ده مع اللي حواليك .. محتاج كتيير تكتب وتتصالح مع نفسك زى ما هيا .. وتقلل صوت جلد الذات اللي جواك .. وتتقبل عيوبك وتشتغل على انك تصلح نفسك ليك ولراحتك قبل كل شىء .. ده حيساعدك كتيير انك تنفتح على اللي حواليك وتعبر عن نفسك من غير ما تحتاج تروح وتيجي كتيير ..
لو حسيت ان حد مهددك مش مطمنك فمخرج منك الطريقة ديه .. تواصل بوضوح متتكسفش تسأل في ايه .. لو اللي قدامك ساعدك يبقى فعلا مهتم .. ولو قفش وبعد يبقى هو كمان بدأ يكلمك من ورا قناع .. فحظك وقع في شخص عنده مخاوف زيك بشكل تاني .. وعلاقتكم حتستمر بس لو في واحد فيكم بيفضل موجود للتاني .. ويفضل ياخد خطوة للاستمرار بالتحمل شوية ..
العلاقات عمرها ما كانت سهلة .. بتحتاج مجهود عشان تكمل .. والعلاج السحري هو التواصل والوضوح .. بلاش خوفك يقيدك تمد ايدك وتتكلم
.. وبلاش تخوف غيرك وتعيشه مش مطمن حواليك بغموضك وعدم تواصلك ..
نمد جسر بينا وبين بعض .. علاقاتنا اكيد حتبقى اقوى وحتقتل الخوف جوانا