منتدى الفرح المسيحى - لو قطر الجواز فاتك

https://upload.chjoy.com/uploads/1497474293141.jpg

البنت بتوصل لمرحلة من عمرها وبتبقي نفسها تتجوز علشان ترضي المجتمع اللي هي عايشه فيه وعشان تثبت انها بنت كاملة ومش معيوبة .. وفي نفس الوقت ترضي غريزة الإنوثه والبنت الطفلة اللي جواها ام ضفاير اللي كان نفسها تتجوز وتلبس الفستان الأبيض .. كل ده جميل جدا .. لكن اللي مش جميل انك تختاري اي حد يدخل معاكي جوه برواز حياتك اللي هيتعلق في الصالون .. لمجرد يبقي سبب في انك تلبسي الفستان الابيض اللي حلمتي بيه .. انا عندي تعيشي عمرك كله بجلابيه المطبخ سعيده وفرحانه مع اسرتك .. حرة طليقه .. ولا تلبسي فستان ممكن يبقي سبب في تعاستك .. او يخليكي جارية عند حد
المشكلة ان البنت اللي جواها كل الرغبات المكلكعه اللي قولتها فوق دي يوم مابتختار للأسف ممكن تسئ الإختيارات وتقدم تنازلات مبالغ فيها لمجرد نفسها تفرح وتكتم افواه كل اللي حواليها .. بتكون عاوزة تقولهم اتكتموا بقي اديني اتنيلت واتجوزت اهو .. ارتاحتوا كده !!
صدقيني حتي لو هم كده ارتاحوا فأنتي عمرك ماهترتاحي ومفيش حد منهم هيمد ايده ويمسحلك دمعه تكون شاردة من عيونك .. تنازلي عن أكلك لأختك .. جزمتك لصاحبتك .. فستانه لواحده مسكينة .. إلا الجواز .. اياكي تقدمي فيه اي تنازلات وتقولي هختار احسن الوحشين .. لأن احسن الوحشين راح ولا جه فهو اسمه وحش زيهم ..
وأرجع واقول .. لو قطر الجواز فاتك .. اكرملك ترجعي بيت ابوكي وتعيشي معززة مكرمه فيه .. افضل من انك تتشعبطي في المواصلات علشان تلحقيه .. والعبرة بين السطور ..